نیویارک۔ 30 جنوری (اے پی پی) اقوام متحدہ اچ پاکستان دی سفیر ملیحہ لودھی کونسل نال خطاب کریندے ہوئیں آکھیے جو اساکوں توقع اے جو گال مہاڑ دے ایں دور اچ کجھ ملکاں ای انفرادی خواہشات دی بجائے پوری دنیا دے ملکاں دی اجتماعی خوشحالی تے توجہ ڈتی ویسی۔انہاں آکھیا پاکستان تے اٹلی دی قیادت متحدہ مفاہمتی گروپ ( یوایف سی) جیرھے جو مستقل ارکان اچ ودھارے دے خلاف اے ،انہاں ولوں پیش کیتی گی تجویز جمہوری نظریات تے مبنی اے تے سارے ملکاں دے مفادات دا تحفظ کریندی اے ۔ملیحہ لودھی آکھیا اساکوں کجھ ملکاں دی ذاتی خواہش دی بجائے سلامتی کونسل دے جامع اصلاحاتی پہلوواں کوں سامنڑے رکھنڑاںچاہیدے ۔ انہاں اصلاحاتی عمل کیتے ہک واضح روڈ میپ ڈیونڑ تے وی زور ڈتا ۔ملیحہ لودھی متحدہ عرب امارات دی نمائندہ لانا زکی نسیبہ اتے لکسمبرگ دے نمائندہ کرسچن بران دے موقف دی تعریف کیتی جنہاں اصلاحاتی عمل کوں اوپن، شفاف بنڑاونڑ تے بئے ملکاں دے احترام تے زور ڈتا ۔گروپ آف فور جن اچ برازیل ، بھارت ، جرمنی اتے جاپان شامل ہن مستقل نشستاںکوں ودھاونڑ تے زور ڈیندے پن ۔ دریں اثناء جنرل اسمبلی دی صدر مارا اے فرنینڈا ایسپی نوسا اجلاس نال خطاب کریندے ہوئیں آکھیا جو گزریل 25سالاں دے دوران سلامتی کونسل دی تنظیم نو اچ کوئی پیش رفت کائنی تھی ایں سلسلے اچ انہاں لچک ڈکھاونڑ تے زور ڈتا ۔
