اسلام آباد۔13فروری(اے پی پی)برطانوی ارکان پارلیمنٹ ‘بریگزٹ’ معاہدہ ہک واری ول مسترد کر ڈتے،برطانوی دارالعوام اچ نظر ثانی شدہ بریگزٹ معاہدے دے حق اچ 242 ووٹ، مخالفت اچ 391 ووٹ آئن، حکومت کوں اپنڑے پیش کیتے گئے بریگزٹ معاہدے اچ 149 ووٹاں نال شکست تھی گئی۔غیر ملکی خبر رساں ایجنسی ‘اے ایف پی’ دے مطابق برطانیہ دی پارلیمنٹ اچ وزیر اعظم تھریسا مے دے بریگزٹ معاہدے کو ں ہک واری ول کثرت رائے نال مسترد کر ڈتا گئے۔ برطانوی دارالعوام اچ ایں نظر ثانی شدہ بریگزٹ معاہدے دے حق اچ 242 ارکان ووٹ ڈتن جڈاں جو ایندی مخالفت اچ 391 ووٹ پاتے گئن جیں پاروں حکومت کوں 149 ووٹاں نال شکست تھئی اے۔ معاہدہ مسترد تھیونڑ توں بعد ملک اچ معاشی افراتفری دے خطرات پیداتھی گین کیوں جو برطانیہ کوں 29 مارچ کوں 46 سال بعد اپنڑے سب توں وڈے تجارتی شراکت دارنال ہر حال اچ انجھ تھیونڑے۔تھریسا مے ارکان پارلیمنٹ کوں درخواست کیتی ہئی جو او معاہدے دے بغیر یورپی یونین نال انجھ تھیونڑ دے بعد دے وڈے ‘معاشی جھٹکے’ توں بچنڑ دی کوشش کرن۔
