عالمی عدالت انصاف کلبھوشن یادیو کوں بھارتی شہری منیدے ،اوندی بریت اتے بھارت حوالگی دی درخواست مسترد کرڈتی کلبھوشن یادیو پاکستان دی تحویل اچ ہی راہسی،تاں جو اینکوں قونصلر رسائی ڈتی ونجے، پاکستان اپنڑیاں ذمہ دار ی نبھیندے ہوئیں کلبھوشن یادیو کوں سنڑائی گی سزا تے نظرثانی اتے دوبارہ غور سانگے اپنڑیں مرضی مطابق راستہ اپناوے اتے ایں گالھ کوں وی یقینی بنڑاوے جو حتمی فیصلہ تھیونڑ تئیں یادیو دی سزا تے عملدرآمد نہ تھیوے،عالمی عدالت انصاف

دی ہیگ۔ 17 جولائی (اے پی پی) بدھ کوںعالمی عدالت انصاف دے صدر جج عبدالقوی احمد یوسف نیدر لینڈ دے شہر دی ہیگ اچ پاکستانی ٹائم مطابق شام چھی وجے پیس پیلس اچ فیصلہ سنڑایا۔ عالمی عدالت انصاف کلبھوشن یادیو کوں بھارتی شہری منیدے ،اوندی بریت اتے بھارت حوالگی دی درخواست مسترد کریندے ہوئیں واضح کیتے جو کلبھوشن یادیو پاکستان دی تحویل اچ ہی راہسی،تاں جو اینکوں قونصلر رسائی ڈتی ونجے۔عالمی عدالت دے جج آکھیے جو پاکستان اپنڑیاں ذمہ دار ی نبھیندے ہوئیں کلبھوشن یادیو کوں سنڑائی گی سزا تے نظرثانی اتے دوبارہ غور سانگے اپنڑیں مرضی مطابق راستہ اختیار کرے اتے ایں گالھ کوں وی یقینی بنڑاوے جو حتمی فیصلہ تھیونڑ تئیں یادیو دی سزا تے عملدرآمد نہ تھیوے۔ یاد رہوے جو کلبھوشن یادیو دا کیس ڈو سال توں ودھ عرصہ عالمی عدالت انصاف اچ زیر سماعت رہیا۔ پاکستان بھارتی جاسوس کلبھوشن یادیو کوں جاسوسی دے الزام اچ پھاسی دی سزا سنڑائی ہائی۔ ایں توں پہلے جاری سال21 فروری کوں عالمی عدالت انصاف دے 15 رکنی بینچ پاکستان اتے بھارت دے دلائل سنڑن دے بعد اپنڑاں فیصلہ محفوظ کر گھداہا۔ پاکستان ولوں اٹارنی جنرل انور منصور خان دی سربراہی اچ دفتر خارجہ دے ڈائریکٹر جنرل ساﺅتھ ایشیاءڈاکٹر محمد فیصل سمیت بئے حکام تے مشتمل وفد گزریل ڈینھ نیدر لینڈ پجے ہن۔ پاکستان دا مقدمہ لڑن آلے نامور وکیل خاور قریشی وی عالمی عدالت انصاف دافیصلہ سنڑن سانگے اتھاں موجود ہن۔