وزیراعظم عمران خان دی صدارت اچ وزارت اطلاعات تے نشریات اتے ایندے ذیلی اداریاں دی ہک سال دی کارکردگی توں متعلق جائزہ اجلاس وزیراعظم کوں وزارت اطلاعات تے نشریات اتے ایندے ذیلی اداریاں بشمول پریس انفارمیشن ڈیپارٹمنٹ، ریڈیو پاکستان، پاکستان ٹیلی ویژن، اے پی پی اتے بئے اداریاں دی ہک سال دی کارکردگی تے تفصیلی بریفنگ ڈتی گی

اسلام آباد ۔ 5 اگست (اے پی پی) وزیراعظم عمران خان حکومت دی کارکردگی کوں اجاگر کرنڑ سانگے وزارت اطلاعات دے اہم کردار کوں اجاگر کریندے ہوئیں ہدایات جاری کیتن جو ساریاں وفاقی وزارتاں اپنڑیں اپنڑیں ہک سال دی کارکردگی رپورٹ وزارت اطلاعات کو ں ڈیونڑ،تاں جو عوام کوں پی ٹی آئی حکومت دی کارکردگی بارے پتہ لگ سگے۔ انہاں ایہ گالھ سنوار کوں وزارت اطلاعات تے نشریات اتے ایندے ذیلی اداریاں دی ہک سال دی کارکردگی توں متعلق جائزہ اجلاس دی صدارت دوران گالھ مہاڑ کریندے ہوئیں آکھی۔اجلاس اچ معاون خصوصی اطلاعات تے نشریات فردوس عاشق اعوان، معاون خصوصی سیاسی امور نعیم الحق، سیکرٹری اطلاعات، چیئرمین اتے ایم ڈی پی ٹی وی اتے سینئر افسراں شرکت کیتی۔ وزیراعظم کوں وزارت اطلاعات تے نشریات اتے ایندے ذیلی اداریاں بشمول پریس انفارمیشن ڈیپارٹمنٹ، ریڈیو پاکستان، پاکستان ٹیلی ویژن، اے پی پی اتے بئے اداریاں دی ہک سال دی کارکردگی تے تفصیلی بریفنگ ڈتی گی۔ بریفنگ اچ معاون خصوصی ڈاکٹر فردوس عاشق اعوان ڈسایا جو وزیراعظم دی ہدایت مطابق اطلاعات تئیں رسائی دے قنون 2017ءمطابق انفارمیشن کمشنرز تعینات کرنڑ دا عمل مکمل کر گھدا گئے ۔ انہاں ڈسایا جو عبوری ویج ایوارڈ دا اعلان کیتا جا چکے جڈاں جو اٹھویں ویج ایوارڈ کوں ترتیب ڈیونڑ سانگے کم جاری ہے۔ اجلاس اچ ڈسایا گیا جو وزیر اعظم دی کفایت شعاری مہم تحت وزارت اطلاعات گزریل سال 20 کروڑ روپے دی بچت کیتی اتے وزارت دے ذیلی اداریاں اے پی پی اتے پی بی سی توں ریٹائرڈ ملازمین کوں 1.5 ارب روپے پنشن دی مد اچ واجبات ڈتے گن، پی ٹی وی دے ملازماں کوں وی پینشن دے طور تے ڈیڈھ ارب روپے ادا کر ڈتے گن۔ اجلاس کوں ڈسایا گیا جو وزارت اطلاعات اشتہاراں دی منصفانہ تقسیم اتے حکومتی منصوبیں کوں چنگے چریقے نال اجاگر کرنڑ سانگے ہک نویں پالیسی وختی منظوری سانگے پیش کریسی۔ چیئرمین پاکستان ٹیلی ویژن سرکاری ٹی وی اچ کیتی گی اصلاحات اتے ایندے نتیجے بارے وزیر اعظم کوں ڈسایا۔ ایں موقع تے وزیراعظم عمران خان آکھیا جو حکومتی کارکردگی کوں اجاگر کرنڑ سانگے وزارت اطلاعات دا کردار بہوں اہم ہے۔ ایں سانگے وزیراعظم ہدایات جاری کیتیاں جو ساریاں وفاقی وزارتاں اپنڑیں اپنڑیاں ہک سال دی کارکردگی رپورٹ وزارت اطلاعات کوں ڈیونڑ ،تاں جو عوام کوں پی ٹی آئی حکومت دی کارکردگی بارے پتہ لگ سگے ۔ انہاں آکھیا جو معاشرے اچ پاکستانیت کو ں اجاگر کرنڑ کیتے ایجھے پروگرام بنڑائے ونجنڑ جیرھے جو حقیقی معنیاں اچ اساڈے معاشرتی اقدار دی عکاسی کریندے ہونڑ۔