عظیم سرائیکی صوفی شاعر حضرت خواجہ غلام فرید دے ترائے ڈینھوار سالانہ عرس دیاں تقریباں شروع

اسلام آباد ۔ 4 دسمبر (اے پی پی)حضرت خواجہ غلام فرید رحیم یار خان دی وستی چاچڑاں شریف اچ جمیے جنہاں اپنڑی سرائیکی شاعری دے ذریعے امن تے بھرپی دا درس ڈتا ۔انہاں دیاں سرائیکی کافیاں پوری دنیا دے وڈے وڈے گلوکاراں گائن، بر صغیر پاک و ہند دے عظیم صوفی بزرگ شاعر حضرت خواجہ غلام فرید دے سالانہ 122 ویں ترائے ڈینھوار دے عرس دیاں تقریباں کوٹ مٹھن شہر اچ شروع تھی گن ، عرس اچ شریک تھیونڑ کیتے ملک تے باہرلے ملکاں توں ہزاراں دی تعداد اچ زائرین دی آمد دا سلسلہ شروع تھی گئے ۔ عرس مبارک دے موقع تے زائرین دے آونج ، اٹھنڑ بہنڑ ،زیارت اتے کھاونڑ پیونڑ دے بہترین انتظامات کیتے گن ، زائرین دی سوکھ کیتے محکمہ صحت ،پولیس ،ریس کیو 1122،سول ڈیفنس اتے سارے متعلقہ محکمے دے کیمپ وی لاتے گن ۔سجادہ نشین خواجہ معین الدین کوریجہ سربراہ جماعت فریدیا خواجہ محمد عامر شریف کوریجہ ضلعی انتظامیہ دے رلے دربار شریف کوں عرق گلاب نال غسل ڈے تے تقریبات دا باقاعدہ آغاز کیتے عرس دیاں اہم رسماں اچ چادر تے تاج پوشی اتے بتیاں لاونڑ شامل اے ۔عرس دے موقع تے پولیس ولوں سیکورٹی دے بہوں سخت انتظامات کیتے گن جیں اچ 15سو توں ودھ پولیس اہلکاراں دی ڈیوٹی لاتی گئی اے ۔ دربار دے رستیں اچ سی سی ٹی وی کیمریں دے ذریعے وی سخت نگرانی کیتی ویندی پئی اے ۔عرس دے چھیکڑی ڈینھ مقامی چھٹی ہوسی ۔دربار مبارک تے ایں وقت زائرین دی وڈی تعداد شریک اے تے دول ،نغارہ ،بین تے جھمر کھیڈ تے عقیدت دا اظہار کریندی پئی اے ،حضرات خواجہ غلام فرید اپنڑے صوفیانہ کلام اچ سرائیکی وسیب کوں ہک ایجھا رنگ ڈتے جیرھا جو حقیقت تے انہاں دی سنجانڑ بنڑ گئے ۔