اسلام آباد۔یکم جنوری(اے پی پی )اردواتے سرائیکی ادب دا مہاندراناں،معروف ماہر تعلیم ڈاکٹرحفیظ الرحمان طاہر عرف ڈاکٹر طاہر تونسوی جگ توں منہ موڑگئے، طاہر تونسوی کئی تعلیمی اداریاں اچ علم دا ڈیوا بالی رکھیا،تعلیمی بورڈملتان اتے فیصل آباددے چیئرمین رہین،اردو زبان و ادب اچ تحقیق و تدریس نال جڑیے کئی اداریاں دے رکن ریہے،تاریخ، ظنزو مزاح، تنقیدو انتخاب سودھیاں کئی کتاباں لکھیاں،افسانہ نگاری اچ نویکلی سنجانڑبنڑائی۔ڈاکٹر طاہر تونسوی دا اصلی ناں حفیظ الرحمان طاہراتے قلمی ناں ڈاکٹر طاہر تونسوی ہا۔انہاں یکم جنوری 1948کوں کاشانہ محمود تونسہ شریف اچ اکھ کھولی۔وچلی رات سال 2019دے سجھ دے نال ہی انہاں دے جیونڑداسجھ وی لہہ گئے۔مرحوم ڈو پتر اتے ہک دھی سوگوار چھوڑین۔ڈاکٹر طاہر تونسوی انتہائی شفیق استاد،ماہر تعلیم اتے مہاندرے ادبی وعلمی شخصیت ہن جئیں بطوراستادلاہور، ملتان، ڈیرہ غازیخان،کہروڑ پکا، بہاولپور،میانوالی ،خان پوردے کالجز و یونیورسٹیاں اچ علم دا ڈیوان بالی رکھیے۔او ڈائریکٹر کالجز ملتان،تعلیمی بورڈملتان اتے فیصل آباددے چیئرمین رھین۔ڈاکٹر طاہر تونسوی سرائیکی اتے اردو زبان و ادب اچ تحقیق و تدریس سودھے کئی علمی ،تحقیقی وتہذیبی اداریاں نال جڑیے رہین۔انہاں تاریخ، ظنزو مزاح، تنقیدو انتخاب سودھا کئی کتاباں لکھین اتے افسانہ نگاری اچ علم دے کمال ڈکھائن۔انہاں دیاں علمی و ادبی خذمتاں ہمیش یاد رکھیاں ویسن۔
