واشنگٹن ۔ 6 جنوری (اے پی پی) امریکی صدر ڈونلڈ ٹرمپ ایران کوں جنرل قاسم سلیمانی دے قتل دا بدلہ گھننڑ دی صورت اچ سخت انتقامی کاروائی تے عراق کوں اتھاں تعینات امریکی فوجیاں کوں واپس بھیجنڑ دی صورت اچ پابندیاں دی تڑی ڈتی اے ۔ فرانسیسی خبر رساں ادارے دے مطابق فلوریڈا اچ چھٹیاں گزارنڑ دے بعد مواخذے دی کارروائی دا سامنڑاں کرنڑ کیتے واشنگٹن روانگی دے موقع تے صحافیاں نال گال کریندے ہوئیں صدر ٹرمپ آکھیے اگر عراق امریکی فوجیاں کوں بے دخل کرنڑ دی کوشش کیتی تاں اینکوں وی سخت اقتصادی پابندیاں دا سامنڑاں کرنڑاں پوسی۔ صدر ٹرمپ آکھیا جو جنرل قاسم سلیمانی تے حملے دے جواب اچ ممکنہ کارروائی دی صورت اچ امریکی بمباری دا ہدف ایران دیاں ثقافتی جہیں وی تھی سگدین ۔ امریکی صدر پہلے ہی آکھ ڈتے جو او خطے اچ امریکی مفادات کوں نشانہ بنڑائے ونجنڑ تے ایران اچ 52 اہداف کوں نشانہ بنڑیسن تاں جو اپنڑے تازہ بیان اچ انہاں آکیے جو انہاں اہداف اچ یونیسکو دی فہرست اچ ڈو درجن سائٹس سمیت قدیم ثقافتی ورثے دیاں حامل جہیں وی شامل تھی سگدن ۔ ڈوجھے پاسے ناقدین آکھیے جو اینویں امریکی اقدام بین الاقوامی قانون دی سنگین خلاف ورزی ہوسی۔ امریکی صدر دا اجوکا بیان ایران ولوں عالمی جوہری معاہدے توں دستبرداری دے اعلان توں اگلے ڈینھ سامنڑے آئے ۔ واضح رہے جو مذکورہ معاہدے دے تحت ایران ایٹمی ہتھیاراں دی تیاری روک ڈتی ہئی تاں جو موجودہ صورت حال اچ ایں علاقائی امن کیتے کہیں وڈے دھچکے توں گھٹ کائنی ۔
