بغداد ۔ 8 جنوری (اے پی پی) ایران امریکی حملے اچ قدس فورس دے سربراہ جنرل قاسم سلیمانی دے ماریے ونجنڑ دے جواب اچ عراق اچ 2 امریکی فضائی اڈیں تے بیلسٹک میزائل حملے کیتن جیں اچ تقریباً 80 امریکی فوجیاں دے ماریے ونجنڑ دا دعویٰ کیتے ۔ ایرانی خبر رساں ادارے آئی ایس این اے دے مطابق ایں حملے اچ ایران دی ریوولوشن گارڈز کور (آئی آر جی سی) کیتن ۔ فرانسیسی خبر رساں ادارے دے مطابق امریکہ دے سیکرٹری آف ڈیفنس فار پبلک افیئرز دے اسسٹنٹ جوناتھن ہوف مین ڈسائے جو ایران گزریل رات مقامی وقت دے مطابق ساڈھے پنج وجے عراقی علاقیں اربیل اتے عین الاسد اچ امریکی فوج اتے اتحادی فورسز دے اڈیںکوں ہک درجن بیلسٹک میزائلاں نال نشانہ بنڑائے جیں اچ تھیونڑ آلے ضیان دا تعین کیتا ویندا پئے تاں جو ایں دوران وختی کہیں جانی ضیان دی اطلاع کائنی ملی ۔ انہاں آکھیے جو جنگ دے ڈر تے کشیدگی اچ ودھارے دے بعد فوجی اڈیں تے ہائی الرٹ کرڈتا گے ۔امریکی محکمہ دفاع پینٹا گون عراق اچ امریکی بیسز تے میزائل حملیں دی تصدیق کریندے ہوئیں آکھیے جو انہاں بیس کوں نشانہ بنڑاونڑ کیتے میزائل ایران توں فائر کیتے گے ہن ۔امریکی صدر ڈونلڈ ٹرمپ ایرانی حملے دے بعد اپنڑے ہک ٹویٹ اچ آکھیے جو سارا کجھ ٹھیک اے ، عراق اچ ڈو امریکی فوجی بیسز تے ایران توں میزائل فائر کیتے گن ۔جانی و مالی ضیان دا اندازہ لاتا ویندا پئے، اساں ڈے دنیا دی طاقت ور بہترین اسلحے نال لیس فوج اے ،میں کل سویلے بیان جاری کریساں ۔ ایران دے وزیر خارجہ جواد ظریف اپنڑے ٹویٹ اچ آکھیے جو ایران اقوام متحدہ دے چارٹر دے آرٹیکل 51 دے مطابق اپنڑے دفاع اچ مناسب اقدام کریندے ہوئیں عراق اچ امریکی فوجی اڈے کوں نشانہ بنڑائے جتھوں اساڈے شہریاں تے سینئر حکام دے خلاف بزدلانہ حملہ کیتا گے تے اے جوابی کارروائی مکمل کر گھدی۔ اساں کشیدگی اچ ودھارا یا جنگ نی چاہندے لیکن کہیں بئی جارحیت دے جواب اچ اپنڑاں دفاع کریسوں ۔ایران دے پاسداران انقلاب آکھیے جو جنرل قاسم سلیمانی تے حملے دے جواب اچ عراقی علاقے عین الاسد اچ قائم فوجی بیس کوں درجناں میزائلاں نال نشانہ بنڑایا گیا ۔ پاسداران انقلاب ولوں جاری بیان اچ آکھیا گے جو امریکہ ولوں کہیں وی کاروائی دا سخت جواب ڈتا ویسی تے اسرائیل اتے امریکہ دے اتحادی ملکاں کوں نشانہ بنڑایا ویسی ۔بیان اچ امریکہ کوں آکھیا گے جو او اپنڑے فوجیاں کوں مزید جانی ضیان توں بچاونڑ کیتے انہاں کوں عراق توں واپس سڈے ۔وائٹ ہاﺅس توں جاری بیان چ آکھیا گے جو صدر ڈونلڈ ٹرمپ ایرانی اقدام نال پیدا تھیونڑ آلی صورت حال دا جائزہ گھندے پن تے قومی سلامتی ٹیم دے ارکان نال مشاورت کریندے پن ۔
