غزہ۔ 10 جنوری (اے پی پی) فلسطین اچ انسانی حقوق کیتے کم کرنڑ آلے ہک گروپ ولوں جاری رپورٹ اچ ڈسایا گے جو 2019ءاچ غزہ دی پٹی اچ اسرائیلی فوج دی ریاستی دہشت گردی دے نتیجے اچ گھٹ توں گھٹ 27فلسطینی بال شہید تھن ۔غیر سرکاری تنظیم المیزان مرکز انسانی حقوق دی طرفوں جاری رپورٹ اچ ڈسایا گے جو 2019ءاچ اسرائیلی فوج غزہ دی پٹی اچ انسانی حقوق دیاں سنگین پامالیاں دا ارتکاب کیتے۔ ایں دوران فلسطینیاں کوں اجتماعی قتل جیہوجے جرم دا سامنڑاں کرنڑاں پیا ۔ اسرائیلی فوج غزہ اچ ریاستی دہشت گردی دیاں کاروائیاں اچ 27فلسطینی بالاں کوں موت دی نندر سما ڈتا ۔رپورٹ اچ آکھیا گے جو اسرائیلی فوج غزہ اچ فسلطینی بالاں تے عام آبادی دے خلاف طاقت دے وحشیانہ حربے استعمال کریندی اے ۔ غزہ اچ ماہی گیراں، کساناں، ریت بجری جمع کرنڑ آلے مزدوراں تے بئے کم کرنڑ آلیں کوں وی براہ راست حملیں دا نشانہ بنڑایا ویندے ۔رپورٹ اچ ڈسایا گے جو گزریل سال اسرائیلی فوج غزہ دی پٹی اچ تلاشی دیاں کاروائیاں دے دوران 35 فلسطینی بالاں کوں حراست اچ گھدے ۔غزہ دی پٹی تے اسرائیلی فوج دی بمباری دے نتیجے اچ 32 فلسطینی سکولاں کوں تباہ یا انہاں کوں جزوی طور تے ضیان پجایا گے ۔
