تریمت کوں وٹس ایپ تے ہراساں کرنڑ تے ایس ایچ او مخدوم پور معطل ،سخت کاروائی تھیسی ،ڈی پی او

خانیوال ۔ 22 جنوری (اے پی پی) ڈسٹرکٹ پولیس افسر فیصل شہزاد ایس ایچ او مخدوم پور ظفر موہانہ ولوں تریمت کوں ہراساں کرنڑ دے واقعے دا سخت نوٹس گھندے ہوئیں ایس ایچ او مخدوم پور کوں معطل کرڈتے ۔تفصیل دے مطابق مخدوم پور نال تعلق رکھنڑ آلی تریمت صائمہ بی بی دی طرفوں الزام لاتا گے جو ایس ایچ او مخدوم پور ظفر موہانہ کئی عرصے توں میکوں وٹس ایپ تے گندے میسج بھجیندا ہئی جیں تے ڈی پی او واقعہ دا سخت نوٹس گھندے ہوئیں ڈی ایس پی میاں چنوں شبیر احمد وڑائچ دی سربراہی اچ انکوائری کمیٹی بنڑا ڈتی ۔ڈی پی او فیصل شہزاد میڈیا نال گال مہاڑ کریندے ہوئیں ڈسائے جو ایس ایچ او مخدوم پور دا واقعہ جیویں میڈے نوٹس اچ آئے تاں میں ایس ڈی پی او کوں موقع تے پج تے انکوائری دا حکم جاری کیتے تے ابتدائی تحقیق دی روشنی اچ متاثرہ تریمت دے بیان دے بعد کجھ گالھیں اچ حقائق دی روشنی اچ میں ایس ایچ او مخدوم پور کوں وختی معطل کرڈتے ۔انہاں ڈسائے جو انکوائری ٹیم بنڑا ڈتی گئی اے جیں دے بعد سخت محکمانہ کاروائی کیتی ویسی ۔انہاں آکھیے جو اے واقعہ پنجاب پولیس دی بدنامی دا باعث بنڑیے ایجھے پولیس افسر تے اہلکار دی محکمے اچ کوئی جاہ کائنی ،انہاں کوں برداشت نہ کیتا ویسی تے متاثرہ تریمت نال انصاف کیتا ویسی ۔