ملتان ۔06 فروری(اے پی پی) سرائیکی، اردو دی معروف شاعرہ ،براڈکاسٹراتے ریڈیوپاکستان دی کنٹرولر پروگرامزکوثر ثمرین سٹیشن ڈائریکٹر ریڈیو پاکستان ملتان داچارج سنبھال گھدے۔ او ریڈیوپاکستان ملتان دی پہلی تریمت اسٹیشن ڈائریکٹر ہن۔کوثر ثمرین داتعلق مظفرگڑھ توں اے ۔ انہاں ریڈیو پاکستان ملتان دے بالاں دے پروگرام توں اپنڑے براڈ کاسٹ کیرئیر دا آغاز کیتا ۔انہاں ملتان توں ایم اے اردو کیتے جڈاں جو ایران توں فارسی اچ ڈپلومہ حاصل کیتا۔ریڈ یوپاکستان ملتان دے علاوہ اوریڈیوپاکستان بہاولپور، اسلام آباد، راولپنڈی اتے پشاور دے علاوہ پاکستان براڈ کاسٹنگ اکیڈمی اچ وی کم کر چکین ۔کوثر ثمرین چارکتاباں دی مصنف ہن جنہاں اچ ترائے تے انہاں کوں ایوارڈ مل چکے ،او ڈو واری ریڈیوپاکستان توں پی بی سی ایکسی لینسی ایوارڈ وی گھن چکن۔ ایندے علاوہ پی ٹی وی اتے ریڈیو کیتے ڈرامہ نگار دی حیثیت نال وی انہاں کوں بہوں سارے اعزازت نال نوازیا گے ۔ او نومبر2019ءتوں سنٹرل پروڈکشن اسلام آباد اچ کنٹرولر پروگرامز دی حیثیت توں فرائض انجام ڈینیاں پیاں ہن۔کوثرثمرین دی ملتان آمدتے ریڈیوپاکستان ملتان دے سٹاف انہاں خوش آمدید آکھیے جو پھل پیش کیتے ۔ اے پی پی نال گال مہاڑ کریندے ہوئیں کوثر ثمرین آکھیے میں کیتے اے خوشی دی گال اے وسیب دی دھی دی حیثیت نال میکوں اپنڑے خطے دی خدمت دا موقع ملدا پئے ۔ملتان میڈا ہمیشہ توں مرکز رہیے ،ایں شہر توں میں شاعری شروع کیتی تے اتھاﺅں براڈ کاسٹنگ دا سفر شروع تھئے ،میں کیتے ایں شہر آونڑ اعزاز دی گال اے ۔
