ملتان،مادری زباناں دا عالمی ڈینھ کل منایا ویسی

ملتان ۔19 فروری (اے پی پی)پوری دنیا وانگوں ملتان اچ وی مادری زباناں دا عالمی ڈینھ کل منایا ویسی ۔ایں موقع تے ہر سال وانگوں مختلف سماجی تے ثقافتی تنظیماں اتے اداریاں ولوں خصوصی تقریبات کیتی ویسن۔ زکریا یونیورسٹی ملتان دے شعبہ سرائیکی دا وفد21فروری کوں لوک ورثہ اسلام آبادولوں تھیونڑ آلے میلے اچ شریک تھیسی۔وفد اچ ڈائریکٹر سرائیکی ایریا سٹڈی سنٹر ڈاکٹر ممتازکلیانی، اسسٹنٹ پروفیسر شعبہ سرائیکی پروفیسرڈاکٹر نسیم اختر اتے لیکچرار شعبہ سرائیکی ڈاکٹر خالداقبال شامل ہوسن۔اے پی پی نال گالھ مہاڑ کریندیں ہوئیں زکریا یونیورسٹی دے لیکچرار شعبہ سرائیکی ڈاکٹرخالد اقبال آکھیا جو ہر سال وانگوں شعبہ سرائیکی مادری زباناں دی عالمی ڈینھ دے موقع تے خصوصی تقریبات دا اہتمام کیتے اتے ایں واری وی ڈو ڈینھ پہلے سرائیکی ایریا سٹڈی سنٹر اچ ایں بارے مشاعرہ تھیے جئیں دی صدارت ڈاکٹر ممتاز کلیانی کیتی اے۔مہمان خصوصی محمد اسلم خان گورمانی اتے اظہر کلیانی ہن۔ایں سرائیکی مشاعرے اچ اصغرگورمانی سمیت ملتان،ڈیرہ غازی خان، بھکر، ڈیرہ اسماعیل خان اتے میانوالی سمیت پورے وسیب توں شاعراں دی وڈی تعداد شریک تھئی اے۔