اسلام آباد ۔ 25 فروری (اے پی پی) سرائیکی شاعری دی تاریخ بہوں پرانڑی اتے طاقتور اے،ہنڑ نثر اچ وی رجحان ودھدا پئے۔اے گالھیں سرئیکی دانشور اتے شاعر باسط بھٹی انڈس کلچر فورم ولوں مادری زباناں دے ڈینھ تے کیتے گئے میلے اچ اے پی پی سرائیکی سروس نال گالھ مہاڑ کریندیں ہوئیں آکھی۔انہاں آکھیا جو انڈس کلچر فورم پرے دے رہنڑ آلے علاقیاں سانگے ہک نعمت اے،جئیں ویلھے سرکار اے بار نی چا سگدی تاں انڈس کلچر فورم پورے ملک توں لوکاں کوں کٹھا کریندن،اتھاں لوکاں کوں ہک ڈوجھے نال ملنڑ اتے سنجانڑ بنڑاونڑ دے موقع ملدن،اتھاں مختلف زباناں دے لوکاں کوں لکھنر دا حوصلہ ودھدے ۔انڈس کلچر فورم اتے مختلف تنظیماں اچ ہنڑ بہتری امدی پی اے،اے میلے تھیونڑ نال رابطے ودھدن اتے لوکاں اچ لکھنڑ بارے Inspirationودھدی اے۔انہاں آکھیا جو انڈس کلچر فورم نال مادری زباناں دے مقاصد پورے تھیندے پئن۔ایں موقع تے انہاں آکھیا جو سرائیکی شاعری دی تاریخ بہوں پرانڑی اتے طاقتور اے،ہنڑ نثر اچ وی رجحان ودھدا پئے۔اگر کہیں زبان دی طاقت دا اندازہ لاونڑاں ہووے تاں اوندی نثر پڑھی ونجے۔ہنڑ سرائیکی اچ نصابی سطح تے وی موقع مل گئن۔انہاں آکھیا جو میڈے شہر کوں اعزاز حاصل اے جو جتنی سوہنڑی نثر احمد پور اچ لکھی ویندی پی اے او کتھائیں کائنی اتے باقی علاقیاں اچ وی نثر بارے سوہنڑاں کم تھیندا پئے۔احمد پور اچ حفیظ خان،انجم لاشاری،جہانگیر مخلص اتے انہاں توں انج بئے ڈھگ دوست نثر تے سوہنڑاں کم کریندے پئن۔
