ملتان۔13مارچ(اے پی پی)ترائے منزلہ انڈس کوئین جیڑھا جو سرصادق عباسی نواب آف بہاولپوراپنڑے شاہی ٹبر کوں اوں ویلھے پانڑی نال بھرے دریا ستلج دی سیر سانگے بنڑوایا ہئی جئیں کوں اوں ویلھے”ستلج کوئین“آکھیا ویندا ہئی ،اج دریائے سندھ دے کنارے بہوں خستہ حالی اچ پیا بئیا خستہ تھیندویندے۔لگ بھگ سو سال پرانڑے انڈس کوئین جیڑھا جو نواب آف بہاولپور ہک روایت دے مطابق کوٹ مٹھن دے صوفی شاعر تے بزرگ حضرت خواجہ غلام فرید ؒکوں1917ءاچ تحفے اچ ڈتا ہئی۔او کئی عرصے تئیں زائرین اتے سامان کوں کوٹ مٹھن (راجن پور) اتے چاچڑاں شریف(رحیم یارخان) گھن آونڑ اچ استعمال تھیندا رہیے اتے 50سال پہلے اینکوں بھاہ لگ گی ہئی جئیں پاروں اے ناکارہ تھی کراہیں سندھ دے کنارے کھڑا ڈتا گیا۔پانڑی دے ایں ترائے منزلہ چھوٹے جہاز اچ چار سو توں ودھ مسافراں دے کھاونڑ دا بندوبست ہئی ،ایں تاریخی جڈانجو ناکارہ جہاز کوں ضلعی حکومت اتے ٹورازم ڈویلپمنٹ کاپوریشن آف پنجاب (ٹی ڈی سی پی )دی تجویز تے ایں کوں بحال کر تے لوکاں دی سیر سانگے استعمال کرنڑ دا منصوبہ بنڑایا گیا ہئی ۔ٹی ڈی سی پی دے کجھ سال رہنڑ آلے ایم ڈی حبیب الرحمن گیلانی ایں بارے کافی بھج دھرک کیتی اتے نہ صرف ڈیرہ غازی خان جڈانجو ملتان اتے مظفر گڑھ اتے بہاولپور اچ سیاحتی اتے ثقافتی سرگرمیاں کوں ودھاونڑ سانگے میڈیا نال وی رابطے اچ رہونڑ دے علاوہ انہاں شہراں اچ سیاحتی سرگرمیاں کوں ودھاونڑ سانگے کئی پروگرامز وی کرویندے رہیے۔بعد اچ انڈس کوئین دی بحالی سانگے کراچی شپ یارڈ توں ماہرین کوں سڈوایا گیا ہئی جنہاں تجویز ڈتی جو ایں موقع تے مرمت کیتا ونجے جڈانجو ایں دے پرانڑے ”سلوسپیڈڈیزل انجن “دی جاہ نویں انجنڑ لاتے ونجن اے انہاں ماہرین اتے بئے ماہرین اوندی مرمت دا جیڑھا تخمینہ لا کراہیں ضلعی حکومت کوں ضلعی حکومت کوں ڈتے ایں دے بعد اے منصوبہ فائلاں اچ دب گئے ۔غازی گھاٹ ڈیرہ غازیخان دے لگ بھگ 120کلومیٹرپرے کوٹ مٹھن دے نیڑے کھڑے انڈس کوئین دی قیمتی شہیں،کاپر دی شہیں اتے بیا سامان چوری کر گھدا گیا،ہنڑ اے ڈھانچے دی شکل بنڑ تے کھڑ گئے ۔
