ملتان۔ 26 جون (اے پی پی)سرائیکی عوامی تریمت تحریک دی نائب صدر ادی نیناں اے پی پی نال خصوصی گالھ مہاڑ اچ آکھے جوایں خطے دی سبھ توں وڈی تے قدیمی سرائیکی قوم کوں پاکستان بنڑن دے بعد وی ملخ دی وڈی آبادی آلی قوم ہوونڑ د ا اعزاز حاصل اے پیا ، چاریں صوبیں ءچ آپنڑوجود رکھنڑ آلیں ست کروڑ سرائیکیاں کوںصدیاں توں رنجیت سنگھ ، انگریزاں تے ول ہنڑ انہاں دے چیلیں تے حواریں دے ظلم ، جبر تے ول وانجھ دا سامنڑا اے۔ حق حقوق دی گالھ ہووے ،بھانویں بنیادی سہولتاں د ا وچار ، وسیب واسی ترقی آلے دور وچ وی صحت ، تعلیم ،روزگار، پیونڑ دے صاف پانڑ ی سودھ آپنڑ ے ای وسائل دے جائز حصے کنوں محروم ہن۔ وسیب واسیں دیں ووٹاں نال اسمبلیاں ءچ پنڑ آلے اَساڈے ممبران تہتر سالاں توں ہر الیکشن تے ساکوں ترقی تے خوشحالی دے خاب ڈِکھیندن پر کم اگوں تے نی ٹردا۔۔ادی نیناں بیا آکھے جے تئیں بال آپ نہ رووے تاں ماءوی کھیر نئیں پلیندی ، اساکوں حق حقوق ڈیواونڑ تاں پرے دی گالھ اے ، اساڈے صحافی ، ادیب ، شاعر جیویں نذیر لغاری سئیں، مشتاق فریدی سئیں ، عاشق بزدار سئیں ، صوفی تاج گوپانگ سئیں ، اکبر ملکانی سئیں ، ظہور دھریجہ سئیں ، ارشاد آمین سئیں، منظور دریشک سئیں ، اسلم رسولپوری سئیں ، شاہد جتوئی سئیں تے انقلابی شاعراں ، ادیباں تے دانشوراں کوں جنھاں حق تے سچ دی بانگ ڈتی رکھی اے ، نویں نسل کوں وی شاباشی بنڑ دی اے جیویں جو معوذ آرائیں، مظہر سعید گوپانگ، سینئر صحافی ڈاکٹر سعدیہ کمال ،جام اظہرمراد لاڑ ، شاہد دھریجہ ،راشد عزیز بھٹہ ، نذرعباس بلوچ ، اختر شاہین رند سمیت سموریں سرائیکی جماعتیں تے سرائیکی ماواں ،بھینڑیں تے دھیریں دی پہلی تنظیم محترمہ عابدہ بتول سئینڑ دی قیادت تے کرن لاشاری دی صدارت ءچ سرائیکی عوامی تریمت تحریک پاکستان دا ودھارا سرائیکی قومی جدوجہد کیتے سوجھلے دیاں لاٹاں ہن، انہاں دی انڑ کھٹ ہمت، حوصلہ تے جدوجہد دا نتیجہ اے ہےجو تخت لہور تے شہر اقتدار دے ایواناں ءچ حق دیاں بانگاں مِلنڑ شروع تھی گئین۔ قومی اسمبلی ءچ میاں ریاض حسین پیرزادہ تے مہر ارشاد سیال دا سرائیکی قوم نال ول وانجھ ، روہی واسیں دے زمیناں تے قبضے ، سرائیکی نصاب پڑھاونڑ پاروں احتجاج تے ول تخت لہور دے مونہہ زور ایوان ءچ دھرتی دی مائی شازیہ عابد دی تقریر سرائیکیاں کوں ہک نواں جوش تے جذبہ ڈتے۔ پنجاب اسمبلی ایوان ءچ ایم پی اے شازیہ عابد دا خطاب دوکھے بازاں دی اندھیر نگری ءچ سوجھلےدی لاٹ اے، محترمہ شازیہ عابد ،میاں ریاض پیر زادہ تے مہر ارشاد سیال دے اسمبلی اچ صوبے دے ایشو کو چاونڑ تے تھوریت ہیں۔
