اسلام آباد۔01جولائی(اے پی پی)پارلیمانی سیکریٹری برائے انسانی حقوق لال مالہی آکھیا جو اسلام آباد دے شہری ولوں وفاقی دارالحکومت اچ مندر دی تعمیر رکواونڑ عدالت ونجنڑافسوس دی گالھ اے۔آپنڑے جاری کیتے گئے بیان اچ انہاں آکھیا جو پاکستان دا آئین تے قانون اقلیتاں دے حقوق دی ضمانت ڈیندے۔انہاں آکھیا جو پاکستان اچ ہر مذہب دے لوک رہندن اتے سارے پاکستانیاں دا برابر حق اے۔مندر بنڑنڑ نال نہ صرف اسلام آباد اچ رہنڑ آلی ہندوبرادری فائدہ چیسی جڈانجو پورے جگ توں اسلام آباد آونڑ آلے بئی ہندو وی فائدہ چیسن۔لال مالہی آکھیا جو اسلام آباد اچ کرشنا مندر بنڑنڑ دی او مخالفت کریندے پئن جیڑھے پاکستان دے سافٹ امیج دی مخالفت کریندن۔او بندے قائد اعظم محمد علی جناح دے ایں نظریے دے وی مخالف ہن جنہاں 11اگست1947ءکوں دستور ساز اسمبلی اچ بیان ڈتا ہئی ۔پاکستان دے بانی نشابر لفظاں اچ آکھیا ہئی جو ’تساں آزاد ہیوے“اتے آپنڑے مندر ونج سگدو،تساں آزاد ہیوے آپنڑی مسیتاں اچ ونجنڑ سانگے اتے ریاست پاکستان اچ آپنڑی کہیں وی عبادت گاہ ونجنڑ سانگے۔تسااڈا تعلق کہیں وی مذہب ،ذات یا نسل توں ہووے،ریاست دا ایں نال کوئی ڈیونڑاں گھنڑاں نئی۔لال مالہی آکھیا جو کرشنا مندر سانگے H-9/2 اچ 4 کنال پلاٹ نیشنل کمیشن آف ہیومن رائٹس دی ہدایت تے CDA 2017 اچ ہندو پنچائت اسلام آباد کو ںالاٹ کر تے قبضہ ڈتا ہئی ۔مندر دے پلاٹ دے نیڑے کرسچن کمیونٹی اتے پارسی کمیونٹی کوں وی انہاں دی مذہبی عبادت گاہیں بنڑاونڑ سانگے پلاٹ الاٹ کیتے گئے ہن۔انہاں آکھیا جو ہک ہفتے پہلے 23جون کوں کرشنا مندر بنڑنڑ دا افتتاح تھی گئے اتے اوندی کندھی بنڑدی پئی اے۔25جون کوں وزیراعظم عمران خان اقلیتی ارکان اسمبلی دے وفد نال ملاقات اچ مندر سانگے فنڈز ڈیونڑ دا یقین ڈوایا ہئی اتے ایں بارے وفاقی وزیر برائے مذھبی امور نورالحق قادری کوں ہدایت جاری کیتی ہئی۔انہاں آکھیا جو انہاں کوں یقین اے جو معزز عدالت نہ صرف ایں پٹیشن کوں ناقابل سماعت قرار ڈیسی جڈانجو کورٹ دا قیمتی ویلھا ضائع کرنڑ تے درخواست ڈیونڑ آلے تے جرمانہ وی لیسی۔
