ملتان وچ سول سیکرٹریٹ بنڑنڑ نال خطے دے 30ہزار نینگراں کوں نوکریاں مل ویسن ، ترجمان وزیر اعلیٰ پنجاب محمد ندیم قریشی

ملتان ۔ 19 جولائی (اے پی پی) وترجمان وزیراعلیٰ پنجاب و صوبائی پارلیمانی سیکرٹری برائے اطلا عات و ثقافت محمد ندیم قریشی آکھیے جو جنوبی پنجاب دے دل ملتان اچ سول سیکرٹریٹ بنڑنڑ پاروں خطے دے 30 ہزار نینگراں کوں نوکریاں ملسن اتے عوام دا معیار زندگی بہتر تھیسی ۔ ماضی اچ جانڑ بجھ کراہیں ایں علاقے کوں پسماندہ رکھیا گیا جیں دی وجہ توں لوکاں اچ احساس محرومی جاگیا ۔پاکستان تحریک انصاف دی حکومت سول سیکرٹریٹ دے قیام نال ایں خطے کوں نویں روح ڈتی ، عوام دے مسئلے ہنڑ خطے وچ ہی حل تھیسن ہنڑ کہیں کوں لاہور نہ ونجنڑاں پوسی ۔اے گال ترجمان وزیر اعلیٰ پنجاب محمد ندیم قریشی گزریل ڈینھ پی ٹی آئی سٹی دے نائب صدر عبدالوہاب خان دی رہائش تے میڈیا دے نمائندیں نال گال مہاڑ کریندے ہوئیں آکھی اے انہاں آکھیے جو جنوبی پنجاب دا سیکرٹریٹ بنڑنڑ پاروں اتھاں دے عوام کوں ریلیف مل ویسی اساڈے مسئلے موقع تے حل تھیسن ۔