اسلام آباد۔ 22 اگست (اے پی پی سرائیکی سروس)صوبے دا وعدہ پورا کریسوں،صوبہ کمیشن دی تجویز وزیراعظم دی خدمت اچ پیش کریسوں۔اے گالھیں وزیراعلیٰ پنجاب سردار محمد عثمان خان بزدار’ سرائیکستان قومی کونسل دے صدر ظہور دھریجہ نال وزیراعلیٰ ہاوﺅس لاہور اچ ملاقات کریندیں ہوئیں آکھی۔وزیراعلیٰ آکھیا جو وسیب دی محرومی دے خاتمے سانگے اقدامات کریندے پیوں،تھل دے علاقہ چوبارہ اچ بہوں وڈا صنعتی زون بنڑیندے پیوں۔انہاں آکھیا جوبہاولپور کوں وی انڈسٹریل زون ڈتا گئے اتے کئی سالیں توں رُکیے ہوئے رحیم یارخان انڈسٹریل زون کو ںفنکشنل کر ڈتا گئے ۔انہاں آکھیا جو بہاولپور کوں سی پیک نال لنک اپ کریسوں۔جڈانجو انڈس ہائی وے کوں موٹروے بنڑیندے پیوں جئیں دا راجن پور ، ڈی جی خان ، تونسہ اتے ڈی آئی خان کوں وی فائدہ تھیسی۔انہاں آکھیا جو وسیب اچ نویں یونیورسٹیاں بنڑیسوں،خان پور کیڈٹ کالج وی جلدی بنڑسی،نانویں اتے ڈاہویں جماعت اچ سرائیکی پڑھاونڑ سانگے ایس ایس ٹی دی بھرتیاں کیتی ویسن اتے کالجاں اچ سرائیکی لیکچرز دی اسامیاں بئی ودھائی ویسن۔ ظہور دھریجہ وسیب دے مسئلیاں بارے ڈسیندیں ہوئیں آکھیا جو سب سول سیکرٹریٹ صوبے دا متبادل کائنی،وسیب کوں صوبہ وی چاہیدے اتے نال سنجانڑ وی چاہیدی اے۔انہاں آکھیا جو ملتان ڈویژن کوں جھنگ ہیڈ تریموں سیراب کریندے،اینویں ڈی جی خان سودھے وسیب دے بئے ضلعیاں کوں میانوالی بیراج توں پانڑی ملدے۔پانڑی دے بغیر صوبے دا کوئی فائدہ کائنی۔ایں تے وزیراعلیٰ سوال کیتا جو وسیب دی سنجانڑ اتے حدود دا مسئلہ کینویں حل تھی سگدے،جئیں تے ظہور دھریجہ آکھیا جو پارلیمانی صوبہ کمیشن بنڑاونڑاں چاہیدے جیڑھا جو صوبے دے ناں،حدود اتے بئے مسئلیاں تے اپنڑی تجویزاں بنڑاوے۔انہاں آکھیا جو صوبے دا دارالحکومت ملتان کوں نہ بنڑایا گئیا تاں وسیب ترٹ ویسی،ملتان وسیب دا مرکزی شہر ہوونڑ دے نال نال وسیب دے ادھ اچ وی اے۔ظہوردھریجہ ایں موقع تے ریجنل اخباراں دے نال نال وسیب دے ادیب،شاعراں اتے ہیڈراجگاں دے مسئلے تے وی گالھ کیتی اتے عالمی شہرت یافتہ حاجی غلام فرید کنیرہ دے سرکاری خرچ تے علاج اتے مالی امداد اتے عربی کفیل اتے مصری منیجر دے ظلم توں تنگ تھی کراہیں خودسوزی کرنڑ آلے چوٹی زیریں دے نینگر صدام حسین ملغانی دی بیوہ دی امداد اتے ملازمت دا وی مطالبہ کیتے،جئیں تے وزیراعلیٰ متعلقہ حکام کوں ہدایت کیتی جو انہاں مسئلیاں کوں فوری حل کیتا ونجے۔
