تحریر ۔۔امتیاز احمد
اسلامی تعلیمات معاشرے اچ اخوت تے محبت تے ایثار اتے قربانی دے لازوال جذبے دے ودھارے سانڳے غریب بے کس تے لاچار لوکاں دی مدد نال ساری انسایت کوں ہک ݙوجھے دے وقار اتے احترام دا درس ݙیندین۔ پاکستان تحریک انصاف دی اڄوکی حکومت ریاست مدینہ دے تصور کوں ݙیکھدیں ہوئیں وزیراعظم عمران خان دی قیادت اچ ملک اچ وسݨ آلے بے سہارا طبقے دے احترام تے وقار کوں یقینی بݨاوݨ اتے غریبی پاروں مجبور فٹ پاتھ تے سڑکاں تے کھلے اسمان تلوں حیاتی گزارݨ آلے لوکاں سانڳے ݙاہ نومبر ٢٠١٨ کوں شیلٹر ہوم پناہ گاہ پروجیکٹ دا منڈھ بدھیا۔
وزیر اعظم عمران خان ایں منصوبے تے افتتاح دے موقع تے خطاب کریندیں ہوئیں آکھیا جو اے منصوبہ انہاں دی حکومت دی ترجیحات اچ شامل اہم منصوبہ اے، انہاں آکھیا جو بے سہارا طبقے کوں پناہ گاہ ݙیوݨ ہک خواب ہئی اتے پناہ گاہ بݨاوݨ ریاست مدینہ آلے پاسے ہک عملی قدم اے۔
انہاں مسافر ، مزدور بے گھر لوکاں کوں باعزت سہولتاں ݙیوݨ نال معاشری ترقی دا وی منصوبہ قرار ݙتے۔ پاکستان اچ ٢٠١٧ دی مردم شماری دے مطابق ملک دی آبادی دا لگ بھگ ݙو سو ویہہ ملین اے اتے ایں وچوں وییہ ملین دی آبادی گھر یا رہائش دی ناکامی سہولتاں دے لوکاں دی اے۔
ایں بارے شیلٹر ہوم منصوبہ سماجی بہبود تے معاشرتی ترقی دا منصوبہ اے اتے وزیر اعظم عمران خان دے ریاست مدینہ اتے فلاحی ریاست دے قیام دے خواب دی عملی تعبیر اے جئیں دا مقصد مزدور اےتے بے گھر طبقے کوں باعزت رہائش دی سہولتاں ݙیوݨ اے۔ ایں ویلھے لہور شہر اچ چھی شیلٹر ہومز جنہان اچ بھاٹی گیٹ، فروٹ مارکیٹ، ریلوے اسٹیشن، لاری اڈا، ٹھوکر نیاز بیگ اتے گلبرگ شامل ہن۔
صوبائی وزیر برائے محکمہ سوشل ویلفیئر و بیت المال پنجاب یاور بخاری “اے پی پی “نال ڳالھ مہاڑ کریندیں ہوئیں آکھیا جو معاشرے دے ضرورت مند طبقے دی مدد کرݨ اڄوکی حکومت دا ترجیحی ایجنڈا اے، وزیراعظم عمران خان ملک دی چنڳائی اتے فلاح سانڳے ݙینھ رات کم کریندے پئن۔ انہاں آکھیا جو پنجاب حکومت صوبے دے سارے ٣٦ضلعیاں اچ ٩٢ عارضی پناہ گاہواں بݨائن۔ انہاں آکھیا جو مقامی اتے عالمی سطح تے وی پاکستان تحریک انصاف دی اڄوکی حکومت دے ایں شاندار منصوبے دی تعریف تھیندی پئی اے۔ انہاں آکھیا جو پہلے غریب لوک سخت موسم اچ فٹ پاتھ تے سمدے ہن اتے ہݨ او آرام د ہ بسترے اچ مزے نال رات لنگھیندن جیڑھی جو غریب لوکاں سانڳے وݙی سہولت اے۔
سوشل ویلفیئر آفیسر بھاٹی گیٹ پناہ گاہ‘عبدالرحمان ݙسیا جو اساں ݙے ١٤٢ مرداں اتے عورتاں سانڳے سولہاں رہائشی بیڈز دی گنجائش اے۔ ست ہال مرداں سانڳے جڈانجو ݙو ہال تریمتاں سانڳے مختص ہن۔ انہاں آکھیا جو پناہ گاہواں اچ رہوݨ سانڳے ہک مناسب طریقہ کار اختیار کیتا ویندے جئیں دے تحت کورونا ایس او پیز کوں ڈیکھدیں ہوئیں ساریاں توں پہلے انہاں دی صحت چیک کیتی ویندی اے۔ انہاں کوں پناہ گاہ اچ آوݨ توں پہلے ماسک ݙتا ویندے اتے اصل کمپیوٹرائزڈ شناختی کارڈ دی پڑتال کیتی ویندی اے۔
انہاں آکھیا جووزیر اعظم عمران خان ولوں سارے شہریاں سانڳے نیا پاکستان ہائوسنگ دا منڈھ وی بدھ ݙتا ڳئے ایں منصوبے نال شہریاں کوں مستقل طور تے آپݨے گھر گھنݨ اچ مدد ملسی۔
لاہور دی پناہ گاہ اچ رہوݨ آلے کہروڑ پکا دے رہوݨ آلے حمزہ ݙسیا جو او اتھاں مزدوری سانڳے آئن اتے رات گزارݨ سانڳے داتا دربار دے نیڑے پناہ گاہ اچ رہندن، انہاں پناہ گاہ اچ گدی، تکیے گرم لحاف اتے ایندے علاوہ معیاری کھاوݨ پیوݨ اتے ٻئی ݙتی ڳئی سہولتاں تے اطمینان کیتے۔ کوئٹہ توں تعلق رکھݨ آلے ہک شہری شیر علی ݙسیا جو او کوئٹہ توں مزدوری کرݨ سانڳے اتھاں لہور اچ آئن اتے انہاں کنے رہوݨ سانڳے کوئی سہولت کائنا ہئی پر اڄوکی حکومت ولوں پناہ گاہ دی صورت اچ غریب عوام سانڳے ہک بہترین رہائشی سہولت ݙتی ڳئی اے۔
پاکستان تحریک انصاف دی حکومت ولوں معاشرے دی ضرورت مند اتے مستحق طبقے کوں پناہ گاہ جیھی بنیادی سہولت یقیناً ہک مستحسن اتے بروقت اقدام اے جیڑھا جو خصوصی طور کمزور طبقے دی بہبود اتے فلاح انسانیت نال اسلامی فلاحی ریاست دے خواب کوں شرمندہ تعبیر کرݨ اچ مدد ݙیسی۔
