اسلام آباد۔25نومبر(اے پی پی)وفاقی وزیر برائے غذائی تحفظ و تحقیق سیّد فخر امام اتے وزیر صنعت و پیداوار خسرو بختیار آکھیے جو حکومت ملکی لوڑھ سانڳے 6 ملین ٹن کݨک ڳھدی اے، ایں ویلھے کݨک دے 5.3 ملین ٹن ذخائر ہین، ایں سیزن کݨک دا پیداواری ہدف 28.9 ملین ٹن اے، ڄݙاں جو 13 لکھ ٹن کݨک درآمد کرݨ کیتے بک کروا ڳھدی اے جیندے بعد ساݙے ذخائر 6.6 ملین ٹن تھی ویسن۔ اے ڳالھ انہاں اسلام آباد اچ پریس کانفرنس کریندے آکھی۔ انہاں آکھیا جو سندھ کݨک دی ودھ امدادی قیمت دا اعلان کیتے ڄیڑھا وفاق دی امدادی قیمت توں ودھ اے ایندا آئینی حل ڳلیندے پئے ہیں، سندھ حکومت عوام تے مہانڳ دا ٻھار سٹیندی پئی اے۔ انہاں آکھیا جو کھاداں تے کوئی نواں ٹیکس نہ لایا ویسی، یوریا دی قیمت ڳھٹاوݨ کتیے اقدامات کیتن، کاشتکاراں دے سوکھ کیتے فرٹیلائزر تے 15 ارب روپے دی سبسڈی ݙتی اے، حکومت کارٹل اتے ذخیرہ اندوزاں دے خلاف موثر کارروائی کریندی پئی اے، پیداوار ودھاوݨ کیتے نویں فرٹیلائزر پالیسی آندی پئی اے۔
