اسلام آباد۔8دسمبر(اے پی پی)وزیراعظم دے مشیر خزانہ ومحصولات شوکت ترین سندھ اچ حکومتی ملھ تے کݨک ݙیوݨ سانڳے نگرانی دا موثر نظام ٻݨاوݨ دی صلاح ݙیندے آکھیے جو حکومت ملک اچ بنیادی ضرورت دیاں شئیں سوکھے طریقے نال عوام کوں ݙیوݨ دے اقدامات کریندی پئی اے، وزارت صنعت وپیداوار مقامی منڈیاں اچ خوردنی تیل دیاں قیمتان ہتھیکے رکھݨ اتے بین الاقوامی مارکیٹ توں پام اتے سویا آئل سستیاں ڳھنݨ کیتے اقدامات کرے۔ اے ڳالھ انہاں نیشنل پرائس مانیٹرنگ کمیٹی دے اجلاس دی اڳواݨی کریندے آکھی۔ اجلاس اچ وفاقی وزیرسیدفخرامام، وزیرمملکت اطلاعات ونشریات فرخ حبیب، سیکرٹری خزانہ، سیکرٹری صنعت وپیداوار، سیکرٹری قومی غذائی تحفظ وتحقیق، ایڈیشنل سیکرٹری تجارت، صوبائی چیف سیکرٹریز، چیف سٹیٹیشن، چیئرمین ٹریڈنگ کارپوریشن آف پاکستان، ایم ڈی یوٹیلیٹی سٹور، اسلام آباد دے ڈپٹی کمشنر اتے سینئر افسران شرکت کیتی۔ اجلاس اچ روزمرہ استعمال اتے خوراک دیاں شئیں دے ملھ دا جائزہ ڳھدا ڳئے۔ سیکرٹری خزانہ مہانگ دی شرح تے بریفنگ ݙتی جو پچھلے ہفتے ملک اچ مہنگائی دی شرح 0.48 فیصد ڳھٹی اے، صوبیاں دے اقدامات نال کݨک اٹے اتے کھنݙا دا ملھ وی ڳھٹسی۔ اجلاس اچ دالاں دی پیداوار، قیمتاں اتے درمآدات دا وی جائزہ ڳھدا ڳیا۔
