ملتان۔10دسمبر (اے پی پی) برصغیر دے عظیم روحانی پیشوا حضرت شاہ رکن عالم دے 708ویں عرس دی ترائے ݙینھ وار دی تقریبات اڄ جمعے توں شروع تھی ڳئن ۔عرس دی تقریبات دا باقاعدہ افتتاح سجادہ نشین درگاہ عالیہ اتے وزیرِ خارجہ مخدوم شاہ محمود قریشی مزار غسل اتے چادر پوشی توں کیتے ۔ایں موقع تے وزیر خارجہ شاہ محمود قریشی ملک دی سلامتی خوشحالی امن و استحکام اتے مریدین کیتے خصوصی دعائیں منگن ۔انہاں آکھیے جو قوم کورونا دے منڈھوں خاتمے کیتے دعاواں کرے ۔ اللہ پاک اساکوں ایں وباء توں مکمل چھٹکارا نصیب فرماوے۔بعد اچ پاکستان زکریا اکیڈمی دے زیرِ اہتمام دربار دے احاطے اچ قومی کانفرنس دا انعقاد کیتا ڳئے جیں دی صدارت مخدوم شاہ محمود قریشی کیتی۔عرس دے ݙوجھے ݙینھ 11 دسمبر ہفتہ کوں قومی کانفرنس دی ݙوجھی نشست اتے12 دسمبر کوں اختتامی تقریبات تھیسن ۔عرس دی مختلف تقریبات اچ سابق وفاقی وزیر علامہ سید حامد سعید کاظمی دربار فرید کوٹ مٹھݨ دے سجادہ نشین خواجہ معین الدین کوریجہ جید عالم دین علامہ غلام مصطفیٰ رضوی دربار عرفانیہ سندر شریف دے سجادہ نشین پیر سید محمد حبیب عرفانی دربار حضرت سخی نواب دے سجادہ نشین مخدوم محمد زوہیب گیلانی دربار حضرت چادر آلی سرکار دے سجادہ نشین پیر سید علی حسین شاہ میرا شریف دے سجادہ نشین پیر محمد فاروق احمد پیر آف کوٹ مٹھݨ شریف خواجہ عامر فرید کوریجہ اتے خانقاہ حامدیہ دے سجادہ نشین صاحبزادہ ناصر میاں مہمان خصوصی ہوسن ۔
