اسلام آباد۔15دسمبر (اے پی پی):اقوام متحدہ دی انسانی حقوق کونسل چتاوݨی ݙتی اے جو افغانستان دے عوام کوں ھک انسانی بحران دا سامݨا اے جیں توں بنیادی انسانی حقوق کوں خطرہ لاحق اے۔افغانستان اچ انسانی حقوق دی صورتحال تے ھک اپ ڈیٹ اچ اقوام متحدہ دے انسانی حقوق دے ڈپٹی ہائی کمشنرندا الناشف آکھیے جو جنگ زدہ ملک اچ پابندیاں دے اثرات اتے ریاستی اثاثے منجمد کرݨ دی وجہ توں صورت حال مزید اوکھی تھی ڳئی اے انہاں آکھیے جو بینکنگ سسٹم دے خاتمے اتے لیکوڈیٹی دے شدید بحران معاشی زندگی کوں وݙی حد تئیں مفلوج کرݙتے ، موسم پالے دے نال تریمتاں مرداں اتے ٻالاں کوں شدید غربت اتے بھک دا سامݨا کرݨا پوندا پئے ، انہاں کونسل کوں ݙسائے جو اگست اچ طالبان دے قبضے توں پہلے ہی ایں سال ریکارڈ تے ساریں توں ودھ شہری ہلاکتاں ݙیکھݨ کوں مل چکئن جنہاں اچ ادھ دے نیڑے تریمتاں تے ٻال ہن ۔عالمی ادارے دے عہدیدار آکھیے جو افغانستان دے شہری تنازعات دے خطرے توں ݙوچار ہن کیوں جو ہݨ داعش خراسان اتے ٻئے مسلح گروہاں دی طرفوں مہلک حملے کیتے ویندے پئن ۔
