دبئی۔22دسمبر (اے پی پی):انٹرنیشنل کرکٹ کونسل (آئی سی سی) ٹی 20 اتے ٹیسٹ پلیئرز دی تازہ ترین درجہ بندی جاری کرݙتی اے ، بابر اعظم ٹی 20 اتے مارنس لابوشین ٹیسٹ اچ نمبر ون بیٹر بن ڳئن ۔ محمد رضوان بہترین کارکردگی دی بدولت تریجھے نمبر تے آڳئن ۔ بائولنگ اچ شاہین شاہ آفریدی اتے شاداب خان ٹاپ ٹین پوزیشن تے برقرار ہن۔ آئی سی سی گزریل ݙینھ ٹی 20 اتے ٹیسٹ پلیئرز دی رینکنگ دا اعلان کرݙتے جیں موجب پاکستانی کپتان بابر اعظم مشترکہ طور تے ٹی 20 دے نمبر ون بیٹر بݨ ڳئن ۔ بابر اعظم اتے انگلینڈ دے ڈیوڈ ملان دے ھکو سویں805 پوائنٹس ہن۔2021 اچ ساریں توں ودھ رنز بݨاوݨ آلے پاکستانی وکٹ کیپر بیٹر محمد رضوان چوتھے توں تریجھے نمبر تے پڄ ڳئن ، بائولرز رینکنگ اچ پاکستان دے شاداب خان نویں پوزیشن تے برقرار ہن جݙاں جو شاہین شاہ آفریدی 12 ویں اتے حارث روف دی 22 ویں پوزیشن اے۔ سری لنکا دے ونندو ڈی سلوا پہلی پوزشین تے براجمان ہن۔ ٹیسٹ بیٹنگ رینکنگ اچ آسٹریلیا دے مارنس لابوشین عمدہ کارکردگی دی بدولت انگلش کپتان جو روٹ توں پہلی پوزیشن کھس ڳھدی اے ۔
