اسلام آباد۔21جنوری(اے پی پی)وزیر خارجہ شاہ محمود قریشی آکھیے جو اپوزیشن حکومت کیتے چیلنج نئیں ایندے نال سیاسی انداز نال نمٹسوں، مہانگ تے قابو پاوݨ اچ لڳے ہیں، اپوزیشن اچ اے حوصلہ نئیں جو اڄوکی حکومت دے دور اچ فی کس آمدنی 1457 ڈالر توںو دھ تے 1666 ڈالر تھیوݨ کوں منے، ساݙی حکومت دا چوتھا سال خوشحال پاکستان دا سال ہوسی، حکومت پہلی واری خارجہ پالیسی کوں جیو پولیٹیکل توں جیو اکنامکس دی نویں سمت ݙتی اے، عدالتاں تے اثر انداز تھیوݨ دیاں کوششاں بارے ماضی توں سکھݨ دی لوڑھ اے۔ قومی اسمبلی اچ الیندے انہاں آکھیا جو اسلام آباد ہائیکورٹ اچ گلگت بلتستان دے سابق چیف جج رانا شمیم دے کوڑا تھیوݨ تے فرد جرم لڳݨ اتے موقف مسترد تھیوݨ ثابت کریندے دو ایندے پچھو ہک سوچی سمجھی سازش ہئی جو کیہوائیں عدلیہ کوں متنازعہ ٻݨا تے ن لیگ دے ہائی پروفائل کیس اچ مرضی دے فیصلے ڳھدے ونڄن، اڄ واضح تھی ڳئے جو اے بیان حلفی لندن اچ کیویں ٻݨایا ڳئے، ول ہک کوڑی آڈیو ٹیپ آئی، عدالتاں کوں متنازعی ٻݨاوݨ دیاں کوششاں سانڳے ساکوں ماضی توں سبق سکھݨ دی لوڑھ اے، ہک پاسو آہدو جو عدلیہ دی آزادی جمہوریت اتےر اداریاں کتیے ضروری اے بھل ٻئے پاسو ایندی نفی وی آپ کریندو، سپریم کورٹ تے حملے، جسٹس قیوم ٹیلیفون کہانی، ارشد ملک بلیک میلنگ توں بعد رانا شمیم بیان حلفی ایندا تسلسل ہین، عدالتی کارروائی تے اثر انداز تھیوݨ دی کوششاں ہک خطرناک رجحان اے۔ وزیر خآرجہ آکھیا جو حکومت دیاں چنڳیاں پالیسیاں پاروں ملکی حالات سدھردے پن جیکوں عالمی ادارے وی منیندے پن بھل اے ہمت اپوزیشن اچ کائنی جو حکومت دیاں کامیابیاں منے، ساکوں حقائق دا ساݨا کرݨا چاہیدے۔ کرونا توں بعد خراب عالمی معاشی صورتحال، پٹرلیم مصنوعات دیاں ودھدیاں قیمتاں، کرنسی ڈی ویلیو تھیوݨ دا اثر پاکستان تے وی پوندا پئے ٻھل حکومت ایندے باوجود مہانڳ تے قابو پاوݨ اچ ردھی ہوئی اے۔
