سرائیکی زبان تے ثقافت کوں نمایاں مقام حاصل اے ، سرائیکی زبان وادب کوں پورے ملک اچ ودھارا ݙتا ونڄے، مقررین دا “سرائیکی تہذیب و ادب” دے عنوان توں منعقدہ تقریب توں خطاب

اسلام آباد۔5مارچ (اے پی پی):چیئرمین اکادمی ادبیات پاکستان ڈاکٹر یوسف خشک آکھیے جو سرائیکی زبان تے ثقافت کوں نمایاں مقام حاصل اے سرائیکی ادیباں اتے شعراء کیتے اکادمی ادبیات پاکستان دا پلیٹ فارم تے ویلھا حاضر اے او سرائیکی ادبی اکیڈمی دے زیر اہتمام سرائیکی ثقافتی ݙینھ دے حوالے نال “سرائیکی تہذیب و ادب” دے عنوان توں منعقدہ تقریب توں خطاب کریندے پئے ہن ڈاکٹر یوسف خشک آکھیے جو پاکستان دیاں ساریاں زباناں تے ثقافت سوہݨی اے ساݙی کوشش اے جو اساں آپݨے علاقائی ادب کوں عالمی سطح تے متعارف کراؤں ، انہاں ٻاہرلے ملک رہݨ آلے ادیباں تے زور ݙتا جو او دنیا دی مختلف زباناں اچ ساݙے ادب دے ترجمے کرن تاں جو اساݙے ادب کوں دنیا اچ پذیرائی مل سڳے۔ایں موقع تے خطاب کریندے ہوئیں ڈائریکٹر جنرل ریڈیو پاکستان محمد عاصم کچھی آکھیے جو سرائیکی وسیب دے لوک ٻہوں محنتی ہن سرائیکی سنسکرت توں پراݨی زبان اے اے آکھیا ونڄے جو سرائیکی ثقافت ھک زندہ ثقافت اے تاں غلط نہ ہوسی۔ تقریب توں خطاب کریندے ہوئیں سنئیر صحافی افتخار شیرازی علمدار بخآری پروفیسر خورشید احمد سعیدی پروفیسر رانا سرفراز ابراہم شاہین بلوچ،پنجاب آرٹس کونسل راولپنڈی دے ڈپٹی ڈائریکٹر سجاد حسین احمدانی آکھیے جو سرائیکی ثقافت کوں ودھارا ݙیوݨ کیتے حکومت کوں مزید کوششاں کرݨیاں چاہیدن سرائیکی ادب دنیا دے کہیں ادب توں گھٹ کائنی ۔ سپاس نامہ پیش کریندے ہوئیں سرائیکی ادبی اکیڈمی اسلام آباد دی صدر ڈاکٹر سعدیہ کمال آکھیے جو سرائیکی ادبی اکیڈمی دی کوشش اے جو سرائیکی زبان وادب کوں پورے ملک اچ ودھارا ݙتا وںجے سرائیکی ادیب ھک جاندار ادب تخلیق کریندے پئن تقریب دی نظامت دے فرائض معروف براڈکاسٹر اتے سرائیکی ادبی اکیڈمی دی چیئرپرسن کوثر ثمرین اتے نذیر تبسم انجام ݙتے ،سرائیکی شعرائے کرام سئیں منظور سیال، سئیں پروفیسر جاوید ملک، شاہین بلوچ،سئیں دلشاد محور، سئیں عابد نیازی سوہݨا کلام سݨوا تے حاضرین دے دل موہ ڳھدے، جݙاں جو محمد مزمل عارض صوفیانہ کلام ڳا کراہیں خوب داد وصول کیتی۔ پروگرام اچ ریاض حسین قیصرانی، صابر خان، معظم بڈانی، امیر خان کھرل، سلمان بھٹی، شائستہ یاسمین، ریاض احمد۔ بڈانی، محرم اللہ پتافی، یاور عباس، افسر آسیاب خٹک، فیض مدثر، صابر ملک، ذوالقرنین حیدر، عدیل عباسی، عامر جلالی، حبیب حسین، فہد خان ، فضل قدیر عباس، محمد فرحان اجمل، شوکت محمود خان، محمد عثمان خالد، دلشاد حسین، ناصر عباس دے علاؤہ راولپنڈی اسلام آباد اچ رہݨ آلی سرائیکی کمیونٹی اتے سرائیکی طلبہ وݙی تعداد اچ شرکت کیتی۔