ملتان۔17مارچ (اے پی پی):سیکرٹری سروسز سائوتھ پنجاب نوشین ملک آکھیے جو سیکرٹریٹ اچ آئی جی کمپلیکس دی تعمیر کیتے ݙو پلان تجویز کیتے ڳئن ،ایں حوالے نال جاہ دا حتمی انتخاب جنوبی پنجاب پولیس حکام دی مشاورت توں کیتا ویسی ، اے ڳالھ انہاں جنوبی پنجاب سیکرٹریٹ ملتان دے زیر تعمیر منصوبے تے پیش رفت بارے جائزہ اجلاس دی صدارت کریندے ہوئیں آکھی اے ، انہاں ݙسایا جو آئی جی کمپلیکس دے انٹری گیٹس اتے سکیورٹی دا انڄ نظام ہوسی ، ایں موقع تے اے آئی جی پولیس جنوبی پنجاب عمران شوکت آکھیے جو پولیس حکام جاہ دے حتمی انتخاب کیتے آندے ہفتے جنوبی پنجاب سیکرٹریٹ دا دورہ کریسن ۔انہاں ݙسایا جو قطعہ اراضی محکمہ پولیس کوں منتقل تھیوݨ دے بعد منصوبے دا پی سی ون تیار کرایا ویسی تے اے تعمیراتی منصوبہ محکمہ سی اینڈ ڈبلیودے حوالے کیتا ویسی ۔آئی ڈیپ حکام ایں موقع تے جنوبی پنجاب سیکرٹریٹ دے زیر تعمیر منصوبے بارے تفصیلی بریفنگ وی ݙتی۔ اجلاس اچ اے آئی جی پولیس جنوبی پنجاب عمران شوکت،ایڈیشنل ڈپٹی کمشنر ریونیو محمد طیب خان، ڈپٹی سیکرٹری کوں آرڈینیشن ڈاکٹر محمد ابوبکر،انفرا سٹرکچر ڈویلپمنٹ اتھارٹی اتے بلڈنگ ڈیپارٹمنٹ دے افسران شرکت کیتی۔اجلاس اچ جنوبی پنجاب سیکرٹریٹ دے منصوبے تے پیش رفت دا جائزہ ڳھدا ڳئے تے سیکرٹریٹ اچ آئی جی کمپلیکس دی تعمیر کیتے مختص جاہ تے وی بحث تھئی ۔
