اسلام آباد۔27 اپریل(اے پی پی)وفاقی وزیر اطلاعات مریم اورنگزیب آکھیے جو الیکشن اپݨے ویلھے تے تھیسن، آر ٹی ایس نہ ٻیٹھا اتے ڈبے چوری نہ تھئے تاں ن لیگ ہی جیتسی، چیف الیکشن کمشنر توں استعفیٰ منڳݨ آلیاں کوں ترقی دی شرح منفی کرݨ تے آپ استعفی ݙیوݨا چاہیدے، عمران خان شہباز شریف دے خدمت دے جذبے توں ݙردن۔ اسلام آباد اچ پریس کانفرنس کریندے انہاں آکھیا جو کراچی واقعہ دیاں تحقیقات شروع تھی چکین، چینی سفارت خانے کوں انویسٹی گیشن بارے اپ ڈیٹ رکھیا ویسی، چینی شہریاں کوں فول پروف سکیورٹی ݙتی ویندی پئی اے، نیکٹا دا اجلاس تیکھے سݙیا ویسی، پچھلی حکومت دے ٻݨائے قوانین دا جائزہ ڳھدا ویسی جیندے کیتے ہک نظرثانی کابینہ کمیٹی ٻݨا ݙتی اے۔ انہاں آکھیا جو 7 مئی دے بعد ایندھن، فیول دا مسئلہ مک ویسی، کساناں کوں ڈیزل فراہمی یقینی ٻݨائی ویسی۔ انہاں آکھیا جو ساݙے تے الزام لاوݨ آلیاں کوں شرم آوݨی چاہیدی اے، جیکر منی لانڈرنگ، کرپشن تھوئی ہئی تاں چار سالاں اچ ثابت کیوں نئیں تھئی؟ چیف الیکشن کمشنر 70 لکھ ڈالر دا حساب منگے تاں استعفیٰ منڳدن، الیکشن ویلھے تے ہی تھیسن۔ مریم اورنگزیب آکھیا جو بلیک آؤٹ دا کور ماریا ویندا پئے، تساں تاں پاکستان دی سیاست توں بلیک آؤٹ تھیندے پئے او، تہاڈی کارکردگی دا صفحہ خالی اے تہوں امریکی ازش دا دول وڄیندے ودے او بھل لوک ایندے ݙٹ اچ نہ آسن۔
