کراچی۔23مئی(اے پی پی)سٹیٹ بینک آف پاکستان نویں مانیٹری پالیسی دا اعلان کریندے شرح سود ݙیݙھ فیصد ودھا تے 12 عشاریہ 25 توں 13 عشاریہ 75 فیصد کرݙتی اے۔ سٹیٹ بینک آکھیے جو عمومی مہانگ غیر متوقع طور تے اپریل اچ ݙو سال دی ودھ سطح 13.4 فیصد تئیں پڄی اے، دیہی اتے شہری علاقیاں اچ مہانڳ ٻیا ودھ تے بالترتیب 10.9 فیصد اتے 9.1 فیصد تھی ڳئے۔ زری پالیسی کمیٹی مہنگائی، مالی استحکام، اتے نمو دے وسط مدتی امکانات تے اثرانداز تھیوݨ آلیان تبدیلیاں دی محتاط نگرانی جاری رکھسی۔ مرکزی بنک موجب مانیٹری و اقتصادی پالیسی نال طلب پائیدار کرݨی ہوسی، اڄوکے مالی سال دی اقتصادی پالیسی، انرجی سبسڈی پیکیج نال طلب ودھی اے، مہنگائی اتے عالمی ادائیگیاں دے دباؤ پاروں شرح سود ودھاوݨی پئی اے۔ بنک موجب مہانگ ہک عالمی مسلہ ٻݨدا پئے، مقامی سطح تے حکومت ولوں تیل تے سبسڈی نال وی طلب دا زور مہانگ دا ہدف پورا کرݨ کیتے وݙا چیلنج ٻݨیا ہوئے، اپریل اچ مہنگائی دی شرح پچھلے سال اپریل دے مقابلے 13 فیصد توں وی ودھ چکی اے۔ ایں مالی سال ترقی دی شرح 5.97 فیصد رہݨ دا امکان اے۔
