عوامی خدمت دے جذبے توں سرشار تھی تے ذمہ واریاں ادا کیتیاں ونڄن ،ایڈیشنل چیف سیکرٹری جنوبی پنجاب

ملتان۔24مئی  (اے پی پی):ایڈیشنل چیف سیکرٹری سائوتھ پنجاب کیپٹن( ر )ثاقب ظفر آکھیے جو عوامی خدمت دے جذبے توں سرشار تھی تے ذمہ واریاں ادا کیتیاں ونڄن تے کارکردگی دے اہم اشاریے تے فوکس کیتا ونڄے کیوں جو “کی پرفارمنس انڈیکیٹرز” کہیں وی انتظامی افسر دی کارکردگی دا انڈیکس ہوندن ۔اے ڳالھ انہاں کمشنرملتان عامرخٹک، ڈپٹی کمشنرملتان محمد طاہر،ڈپٹی کمشنر وہاڑی محمد رفیق احسن،ڈپٹی کمشنر خانیوال شاہد فرید تے ڈپٹی کمشنر لودھراں آغا ظہیر عباس شیرازی نال ملاقات کریندے آکھی اے ۔انہاں نویں ذمہ واریاں سنبھالݨ تے ملتان ڈویژن دے کمشنر اتے ڈپٹی کمشنرز کیتے نیک خواہشات دا اظہار کیتا۔ثاقب ظفر آکھیے جو عوام کوں ضروری چیزاں مقررہ نرخاں تے ݙیوݨ کیتے سارے اقدامات کیتے ونڄن ،ترقیاتی منصوبیں کوں معینہ مدت دے اندر مکمل اتے ضلعیں اچ شجرکاری تے توجہ ݙتی ونجے ،نہری پاݨی دی چوری روکݨ تے کھاد دی دستیابی یقینی بݨاوݨ کیتے اقدامات کیتے ویسن تے مراکز صحت توں عوام کوں صحت دیاں سہولتاں ݙیوݨ کوں مانیٹر کیتا ونڄے ۔ ایں موقع تے سیکرٹری ایجوکیشن جنوبی پنجاب ڈاکٹر احتشام انور اتے سیکرٹری زراعت ثاقب علی عطیل وی موجود ہن۔