اقوام متحدہ ۔8جون (اے پی پی):ہنگری دے سفارت کار کسابا کروسی اقوام متحدہ دی جنرل اسمبلی دے 77ویں صدر منتخب تھی ڳئن ، اوستمبر اچ جنرل اسمبلی دے موجودہ صدر عبداللہ شاہد دی جاہ گھنسن ۔چینی خبر رساں ادارے موجب انہاں منتخب تھیوݨ توں بعد آپݨی صدارت کیتے 5 ترجیحات تے کاربند رہݨ دے عزم دا اعادہ کیتے جیں اچ اقوام متحدہ دے چارٹر دے بنیادی اصولاں تے قائم رہݨ، پائیدار تبدیلی اچ اہم پیش رفت کرݨ، مسئلیں دے منظم حل،فیصلہ سازی اچ سائنس دے کردار کوں ودھاوݨ تے پوری دنیا کوں پیش آندے بحراناں نال بہتر طریقے نال نبݨݨ کیتے یکجہتی کوں ودھارا ݙیوݨ شامل اے ۔ انہاں آکھیے اساں خوراک، توانائی اتے قرض جیہے عالمی بحراناں دا سامݨا کریندے پیوں جݙاں جو پاݨی دا بحران آندے بحراناں اچ ساریں توں وݙا خطرہ اے۔ عالمی سطح تے سپلائی دی کمی اتےغذائی چیزاں دیاں ودھدیاں قیمتاں توں 43 ملکاں دے 49 ملین لوک پہلے ہی شدید بھک دا سامݨا کریندے پئن ۔ انہاں ݙسایا موسمیاتی تبدیلی دی وجہ توں سمندر پہلے کݙاہیں اتنے کیمیائی تے گرم نہ ہن جتنے اڄوکے سال تھی ڳئن۔ حیاتیاتی تنوع دے ضیان وی ٻہوں شدت دے حامل ہن تے یوکرین جھیڑا موجودہ چیلنجز کوں مزید ودھیندا پئے ۔
