اسلام آباد۔9جون(اے پی پی)نویں مالی سال کیتے سرکاری شعبہ دے سالانہ ترقیاتی پروگرام (پی ایس ڈی پی) دا حجم 800 ارب روپے مقرر کرݨ دی تجویز اے، 100 ارب روپے پبلک پرائیویٹ پارٹنرشپ دے تحت خرچ تھیسن، پی ایس ڈی پی دے بجٹ اچ جاری منصوباں دی تکمیل تے ودھ توجہ ݙتی ڳئی اے۔ نویں مالی سال کیتے وزارت خزانہ پی ایس ڈی پی کیتے 700 ارب روپے دے فنڈز ݙیوݨ دا آکھیے۔ دیامیر بھاشا ڈیم سودھا ٻئے آبی وسائل دی ترقی، اعلی تعلیم دا شعبہ وی پی ایس ڈی پی دا ترجیحی حصہ اے،ایں سانڳے نوجواناں کیتے فنڈز اتے وظائف ودھائے ویسن، فزیکل انفراسٹرکچر جیویں روڈز، شاہراہواں اتے بندرگاہواں ٻݨاوݨ، انفارمیشن اتے سائنس و ٹیکنالوجی دا ودھارا ترجیح اے۔ نویں مالی سال اختراعی فنڈ ٻݨاوݨ اتے گورنمنٹ کیتے فنڈ رکیے ویسن، حکومتی اداراں، وزارتاں دی ڈیجیٹائزیشن سودھا سائبر سکیورٹی اتے مصنوعی ذہانت اچ تربیت کیتی ویسی۔ وزیراعظم میرٹ بیسڈ لیپ ٹاپ سکیم ݙتی ویسی، ایندے نال ذہین طالبعلم مفت لیپ ٹاپ سودھا آپ ملھ ڳھنݨ کیتے وی اہل ہوسن۔ صوبیاں دے ڳانݙھے نال پیشہ وارانہ تربیت دے 250 انسٹی ٹیوٹ ٻݨائے ویسن، 250 منی سپورٹس سٹیڈیم وی ٻݨسن۔ چینن، پاکستان اقتصادی راہداری دے تحت مختلف منصوباں، پراݨے گوادر شہر اچ بجلی و پاݨی دے مسائل سانڳے فنڈز ݙتے ویسن۔ نویں مالی سال کیتے گروتھ دی شرح 5 فیصد دے نیڑے اے جیڑھی پچھلے سال 4.8 فیصد ہئی۔
