اسلام آباد۔13جون(اے پی پی)صدر مملکت ڈاکٹر عارف علوی ٹیکس کلچر عام کرݨ اتے شکایات ماکوݨ دے نظام کوں تکڑا کرݨ تے زور ݙیندے آکھیے جو شفاف نظام نال ٹیکس نیٹ ودھایا ونڄ سڳدے، وفاقی ٹیکس محتسب دے ادارے تے عوام دا اعتبار ودھدا پئے اتے شکایت کنندگان دی شکایات کوں ڳھٹ توں ڳھٹ ویلھے اچ حل کیتا ویندا پئے۔ اے ڳالھ انہاں ایوان صدر اچ وفاقی ٹیکس محتسب دے ” فوری انصاف آپ کی دہلیز پر” بارے آگاہی سیمینار نال خطاب اچ آکھی۔ سیمینار اچ وفاقی ٹیکس محتسب ڈاکٹر آصف محمود جاہ، ہراسانی دے خلاف تحفظ کیتے وفاقی محتسب کشمالہ طارق، وفاقی انشورنس محتسب ڈاکٹر محمد خاور جمیل، سابق وفاقی ٹیکس محتسب ڈاکٹر شعیب سڈل، ایف بی آر، وفاقی ٹیکس محتسب آفس اتے ٻعے اداریاں دے سینئر افسران اتے مختلف چیمبر آف کامرس اینڈ انڈسٹری دے نمائنداں شرکت کیتی۔
