سرائیکی زبان دے عظیم بزرگ تے صوفی شاعر حضرت خواجہ غلام فرید سئیں ( خورشیدعالم سئیں ) دا وصال 24 جولائی 1901ء بمطابق 6 ربیع الثانی 1319 ھ کوں تھیا ہا

24 جولائی ــ وصال حضرت خواجہ غلام فرید سئیں

؎میں تے یار فرید منڑیسوں

رل مل شہر بھنمبھور

اسلام آباد۔25جولائی  (اے پی پی سرائیکی سروس) سرائیکی زبان دے عظیم بزرگ تے صوفی شاعر حضرت خواجہ غلام فرید سئیں ( خورشیدعالم سئیں ) دا وصال 24 جولائی 1901ء بمطابق 6 ربیع الثانی 1319 ھ کوں تھیا ہا. عیسوی کلینڈر موجب  آپ دے وصال کوں اڄ 121سال تھی ڳئین، اونویں تاں آپ دا عرس مبارک قمری کلینڈر مطابق منایا ویندے. خواجہ سئیں آپݨیں مادری زبان سرائیکی دے نال نال عربی، فارسی، اردو، ہندی، سندھی تے پوربی ءچ وی علم حاصل کیتا تے انگریزی وی سِکھی. ایں واسطے خواجہ سئیں کوں ہفت زبان آکھیا ویندے. اڄ عیسوی کلینڈر موجب خواجہ سئیں دے وصال دے ݙینہہ روہی تھل دمان دے وارث قلم قبیلے دے اڳواݨیں، مُہاندریں، نمائندیں تے سمورے بھیݨیں، بھرانویں کنوں ارداس اے جو آپݨی شناخت تے حق سانگے ہِک مٹھ تھی ٻاݨ ماروں، آپݨیں نسلاں کوں ہک سوہݨا تے سَوکھا مستقبل دان کروں .خواجہ فرید دی شاعری سرائیکی صوبے دی آس، اُمید اے تے اتفاق، اتحاد تے ہِک مٹھ تھی ٻاݨ مارݨ دی گالھ کریندی اے ۔ اڄ سرائیکی تحریک سُنگھڑ تے سوشل میڈیا تے آن کھڑی اے، ونکو ونک دے لیڈر جھمراں دی وڈیو سوشل میڈیا تے نظردن اصل گالھ اے ہے جو اجوکے دور ءچ خواجہ فرید دے کلام کوں سمجنھڑ تے اگوں ودھاونڑ دی لوڑ اے ۔ اڄ خواجہ سئیں دے پیروکاراں کوں توں ارداس اے جو سرائیکی وسیب دے لوک بے مقصد بحثاں چھوڑ آپݨیں مطلب تے مقصد آلے راہ رستے تے ٹُرن ۔خواجہ فرید دے وصال دے 121 ورھیاں بعد وی اوہو سنہیا اے اساکوں دیوان فرید کوں پڑھ تے سمجھ تے عمل کرنڑ تے لوڑ اے

سوہݨاں یار فرید ݙوں آوے

ڳل لاوے سیج سُہاوے

آ اُڄڑی جھوک وَساوے

ہے ٹھڈڑی آہ اثر کر،