اسلام آباد۔31جولائی (اے پی پی) کل جماعتی حریت کانفرنس آزاد جموں تے کشمیر شاخ دے جنرل سیکرٹری شیخ عبدالمتین آکھیا جو پنڄ اگست 2019کشمیریاں دی تاریخ دا ہک کالا ݙینھ اے، مودی سرکاری ایں ݙینھ کشمریاں دی سنڄاݨ تے براہ راست حملہ کیتا۔ بھارت دے ہک پاسہ اقدامات کشمیر دی متنازعہ حیثیت کوں ختم نی کر سڳدے۔ کشمیری عوام بھارت دی ریاستی دہشت گردی دے باوجود حق خودارادیت کیتے آپݨے تحریک جاری رکھیسی۔ کل جماعتی حریت کانفرنس آزاد کشمیر و پاکستان شاخ دے سیکرٹری اطلاعات امتیاز وانی ولوں جاری بیان دے مطابق شیخ متین آکھیا جو مودی دی سربراہی اچ بھارتی حکومت پنڄ اگست 2019کشمیریاں دی تاریخ دا ہک کالا ݙینھ اے، مودی سرکاری ایں ݙینھ کشمریاں دی سنڄاݨ تے براہ راست حملہ کیتا۔بھارتی پارلیمنٹ دی نام نہاد قرارداد دے ذریعہ بھارتی آئین دے آرٹیکل 370 اتے 35A دے تحت علاقے کوں ݙتی ڳئی خصوصی حیثیت اتے خود مختاری کوں منسوخ کیتا ڳئے۔ آرٹیکلز دے ڄاݨ ٻجھ تے غیر قانونی تنسیخ علاقے دے مقامی لوکاں دی پریشانی اچ ودھارا کر ݙتے۔ انہاں آکھیا جو بھارت انہاں دے غیر قانونی اقدامات دے بعد بھارتی حکومت بے گناہ شہریاں دے خلاف جارحانہ اقدامات شروع کر ݙتن جئیں نال انہاں دی بنیادی سہولت تئیں رسائی محروم تھی ڳئی اے۔ انہاں آکھیا جو ایں مہینے پنڄ اگست کوں بھارت دے غیر قانونی طور تے جموں تے کشمیر اچ بھارت دے ہک پاسہ غیر قانونی اقدامات دے ترائے سال پورے تھیوݨ تے یوم استحصال منایا ویندا پئے۔ ایں ݙینھ کشمیری یوم سیاہ بھرپور طریقے نال منا تے بھارت اتے پوری دنیا کوں اے سنیھا ݙیسن جو او بھارت دے ہک پاسہ اقدامات کوں مسترد کریندن۔
