اسلام آباد۔1اگست (اے پی پی) کل جماعتی حریت کانفرنس دی آزادجموں وکشمیر قیادت مقبوضہ جموں و کشمیر اچ بھارتی فوجیاں دے ہتھوں بے گناہ کشمیریاں دے قتل عام اچ ودھارے دی شدید مذمت کریندیں ہوئیں بھارت دے ہتھوں انسانی حقوق دی کھلی خلاف ورزیاں تے عالمی برادری دی مجرمانہ چُپ تے تنقید کیتی اے۔ کشمیر میڈیا سروس موجب کل جماعتی حریت کانفرنس دی آزادجموں تے کشمیرشاخ دے سابق کنوینر محمد فاروق رحمانی اڄ اسلام آباد اچ ہک بیان اچ کپواڑہ دے ہک بے گناہ نینگر اختر احمد بٹ کوں ہک منصوبے دے تحت گزریل ݙینھ ہک جعلی مقابلے اچ قتل کرݨ تے ݙکھ تے افسوس کیتا۔ انہاں آکھیا جو شہید دا ٹٻر دے بیان تھیے اصل حقائق ایں ڳالھ دی تصدیق کریندن جو نینگر کوں 15 جولائی کوں اوندی دکان توں گھیل تے چا ڳئے ہن اتے پولیس اتے فوج دی حراست اچ قتل کرݨ توں پہلے اونکوں زبردستی لاپتہ کر ݙتا ڳیا ہئی۔ کل جماعتی حریت کانفرنس دی آزاد جموں تے کشمیر شاخ دے ترجمان امتیاز وانی اسلام آباد اچ ہک بیان اچ آکھیا جو بھارت جموں تے کشمیر کوں ہک فوجی چھاؤنی اچ بدل ݙتے۔ انہاں آکھیا جو اختر دا قتل انسانی حقوق دی کھلی خلاف ورزی اے۔ انہاں افسوس کیتا جو سفاک بھارتی فورسز کشمیریاں کوں ہر ݙینھ دی بنیاد تے قتل کریندی پئی اے۔
