ہلال احمد
ترجمعہ: محمد نعیم خان
اسلام آباد۔4اگست (اے پی پی) بھارت 1947 اچ جموں تے کشمیر تے غیرقانونی تسلط قائم کرتے کشمیری عوام کوں محکوم بݨا ڳھدے اتے او اقوام متحدہ دی قرارداداں دے مطابق کشمیریاں کوں انہاں دا جائز حق خودارادیت ݙیوݨ نہ چاہندا۔ کشمیریاں دے مطالبے آزادی کوں دباوݨ کیتے انہاں کوں ہمیشہ ظلم تے جبر دا نشانہ ٻݨایا ڳئے۔ 75 سالیں دا عرصہ گزرݨ دے باوجود ہݨ وی بھارت دے پورے مقبوضہ کشمیر اچ انسانی حقوق دی مسلسل اتے بے دریغ پامالیآں جاری ہن۔ مقبوضہ کشمیر کرہ ارض دا او کلھا خطہ اے جتھاں کجھ ہزار مربع میل علاقے اچ اٹھ لکھ توں ودھ بھارتی قابض فوجی تعینات ہن۔ بھارت سرزمین کشمیر تے جبری اتے ناجائز فوجی تسلط کوں جاری رکھݨ کیتے آپݨے سارے وسائل اتے ہتھکنڈے کوں استعمال کریندا پئے۔ 5 اگست 2019ء کوں مقبوضہ کشمیر کوں خصوصی حیثیت ݙیوݨ آلے بھارتی آئین دے آرٹیکل 370 اتے 35 اے دے خاتمے دے بعد بھارت کشمیر اچ مسلماناں دی آبادی دے تناسب کوں تیزی نال بدلدا پئے۔ بھارت خطے اچ بالادست قوت ٻݨݨ دا خواب ݙیکھدا پئے۔ کشمیری عوام اتے پاکستان کݙاہیں وی بھارتی بالادستی نی منی۔ پاکستان کشمیریاں دی ہمیشہ سیاسی، سفارتی اتے اخلاقی حمایت کیتی اے۔ سیاسی مبصرین دے مطابق مقبوضہ کشمیر دی نام نہاد قانون ساز اسمبلی دے انتخابات توں پہلے اسمبلی حلقیاں دی نویں حد بند کیتی ڳئی اے۔ انہاں سارے اقدامات دا مقصد ریاست جموں تے کشمیر دی مسلم سنڄاݨ کوں ختم اتے آبادی اچ مسلماناں دا تناسب ڳھٹ کرݨ اے تانجو مستقبل اچ مقبوضہ کشمیر اچ بھارتیہ جنتا پارٹی دی حکومت بݨائی اے۔ بھارتی حکمراناں آپݨے آئین دی دفعہ 370 دی موجودگی کوں ماضی اچ کشمیر تے آپݨے ناجائز اتے غیر قانونی فوجی تسلط کوں جواز دے طور ہمیشہ پیش کیتے اتے ایندے خاتمے دے بعد ہݨ بھارت دا اے جواز وی مُک ڳئے۔ بھارتی آئین اچ مقبوضہ کشمیر دی خصوصی شہریت دے حق بارے دفعہ 35۔اے کوں وی ختم کیتا ڳئے۔ ریاست دی شہریت بارے اے معاملہ تنازعہ کشمیر توں پراݨی تاریخ رکھیندا ہئی۔ ایں قانون دے تحت مقبوضہ جموں تے کشمیر دی حدود توں ٻاہر کہیں وی علاقے دا شہری جموں تے کشمیر دا شہری نہ بݨ سڳدا اتے نہ زمین تے جائیداد دا مالک ٻݨ سڳداہئی۔ اے قوانین 1927 توں کشمیر اچ نافذ العمل ہن۔
