تونسہ شریف اتے کوہ سلیمان اچ رڄ بارشاں، رودکوہیاں تباہی مچا ݙتی

ڈیرہ غازیخان۔15 اگست(اے پی پی)ڈیرہ غازیخان دی تحصیل تونسہ شریف اچ ودھ بارشاں اتے کوہ سلیمان دی رودکوہیاں دے پاݨی اچ چھل آوݨ نال وݙی تباہی تھئی اے اتے رودکوہی سنڳھڑ نالہ اچ 2 لکھ 68 ہزار 5 سو کیوسک دا سیلابی ریلا رپورٹ تھئے۔ سیلابی ریلے نال قریبی اَبادیاں منگروٹھہ، کاچھل، سوکڑ، مندرانی، بودو، عیدہ ارائیں، لعل شاہ، بستی حبیب، کوٹلہ میرانی،چوکیوالا، ڈگر والی اچ تباہی آئی اے اتے انہاں علاقیاں دے واسی نقل مکانی کریندے پن۔ کئی غھر ݙھے ڳین، زناور ٻݙ موئن اتے 5 توں ودھ ڄݨے پاݨی دی لھر وات آئن۔ علاقے اچ امدادی کم جاری ہین اتے لوکاں کوں محفوظ ڄاہیں تے پچایا ویندا پئے۔ متاثرین اپیل کیتی اے جو امدادی کم تیکھے کیتے ونڄن اتے لوکاں دی بحالی دے تیکھے انتظامات تھیوݨے چاہیدن۔