سیکرٹری زراعت جنوبی پنجاب دا راجن پور اچ رود کوہیاں اتے سیلاب توں متاثرہ علاقیاں دا دورہ

ملتان۔18اگست (اے پی پی) سیکرٹری زراعت جنوبی پنجاب ثاقب علی عطیل راجن پور دا دورہ کیتا۔ رود کوہیاں اتے سیلاب توں متاثرہ علاقیاں اچ فلڈ ریلیف کم دا جائزہ ڳھدا۔ فیلڈ عملے کوں عوام دی رہنمائی کیتے ساتھ ݙیوݨ دی ہدایت کیتی۔ ایں موقع تے انہاں آکھیا جو عوام دی جان تے مال دا تحفظ پہلی ترجیح اے۔ رودکوہیاں دے سیلاب توں متاثرین دی مدد کیتے محکمہ زراعت امدادی سرگرمیاں اچ مصروف اے۔ لوکاں کوں مال مویشیاں سودھے محفوط ڄاہ تے پڄایا ویندا پئے۔ فلڈ ریلیف کیمپ لا ݙتے ڳئن جتھ سیلاب متاثرین کوں کھاوݨ پیوݨ دی شہیں ݙتی ویندی پئن اتے طبی معائنے کیتے میڈیکل کیمپ وی لاتے ڳئن۔ متاثرین کوں گھراں کوں چھوڑن اتے فوری محفوظ ڄاہ تے پجن۔ انہاں آکھیا جو ڈی جی خان اتے راجن پور اچ مینہ اتے رودکوہیاں پاروں سیلابی صورتحال اے جئیں نال کپاہ دی فصل متاثر تھئی اے۔ انہاں آکھیا جو ایں سال ضلع راجن پور اچ 2 لکھ 57 ہزار 67 ایکڑ رقبہ تے کپاہ رادھی ڳئی اے جئیں اچوں رودکوہیاں دے سیلاب نال 48270 ایکڑ جݙانجو دریائی سیلاب نال 178 ایکڑ متاثر تھین۔ روجھان اچ 65838 ایکڑ رقبہ تے کپاہ کاشت اے جئیں اچوں رودکوہیاں نال 369 ایکڑ رقبے تے کپاہ دی فصل متاثر تھئی اے۔ ڈی جی خان اچ کپاہ دے 60784 ایکڑ، تل 9953 ایکڑ، مونگ 18217 ایکڑ، دھان 8153 ایکڑ اتے غھاہ دے 11044 ایکڑ سودھے مختلف سبزیاں دی کاشت وی متاثر تھئی اے۔ انہاں آکھیا جو فصل بیمہ (تکافل) پروگرام دے ذریعے رجسٹرڈ کاشتکاراں کوں ناگہانی آفات نال پیداور اچ نقصان دا ازالہ کیتا ویسی۔ ایں سکیم دے تحت پنڄ ایکڑ دے کاشتکاراں کیتے بیمہ دے پریمیم تے سو فیصد سبسݙی جݙانجو پنڄ توں 25 ایکڑ دے کاشتکاراں کوں 50 فیصد سبسݙی ݙتی ویسی۔