تحصیل تونسہ بارشاں اتے چھل توں ودھ متاثر ،صرف آفت زدہ قرار ݙیوݨ کافی کائنی، پنجاب حکومت امداد دی بحالی کیتے عملی اقدامات کرے، رکن صوبائی اسمبلی خواجہ محمد داؤد سلیمانی

اسلام آباد۔18اگست (اے پی پی سرائیکی سروس) تحصیل تونسہ شریف بارشاں اتے چھل توں ودھ متاثر تھین،صرف آفت زدہ قرار ݙیوݨ کافی کائنی، پنجاب حکومت امداد دی بحالی کیتے عملی اقدامات کرے، اے ڳالھ رکن صوبائی اسمبلی خواجہ محمد داؤد سلیمانی تونسہ دی یونین کونسل ناڑی اچ چھل توں متاثر تھیوݨ آلے علاقیاں اچ امدادی کماں دا جائزہ ڳھنݨ ویلھے میڈیا نال ڳالھ مہاڑ کریندیں ہوئیں آکھی۔ انہاں وزیراعلیٰ پنجاب کوں تونسہ دی دعوت ݙیندیں ہوئیں آکھیا جو وزیراعلیٰ چوہدری پرویز الہی چھل متاثرین دی مدد کیتے آپ اڳوں آون جتھاں وݙے پیمانے تے جانی تے مالی ضیان تھیے ،ہزاراں ایکڑ تے کھڑی فصلاں اتے انسانی آبادی ملیا میٹ تھی ڳئن، انہاں آکھیا جو تونسہ شریف دے درجناں مواضعات سوکڑ، منگھڑوٹھہ، ہیرو، کوٹ قیصرانی، ناڑی، اتے مکول سودھا وہوا تے جلووالی اچ ریکارڈ بارشاں اتے کوہ سلیمان توں آوݨ آلے سیلابی ریلیاں تباہی مچائی ہوئی اے، انہاں آکھیا جو اے قدرتی آفت اساݙے گناہواں پاروں اللہ تعالیٰ دا ہک امتحان اے اتے اساں ساریاں کوں توبہ کرݨی چاہیدی اے۔ خواجہ داؤد سلیمانی افسوس کیتے جو وزیراعلیٰ پنجاب کوں ڈیرہ غازی خان دے دورے ویلھے صرف مخصوص علاقیاں تئیں محدود رکھیا ڳئے اتے تونسہ نہ آوݨ ݙتا ڳیا۔ میں اپیل کرینداں جو وزیراعلیٰ آپ آ تے متاثرہ علاقے دا سروے کراون اتے فوری امداد تے بحالی دے اقدامات شروع کیتے ونڄن۔