مظفرگڑھ،تحصیل کوٹ ادو اچ فلڈ ایمرجنسی وارننگ جاری کر ݙتی ڳئی اے، ترائے موضعیاں کوں خالی کراوݨ دا حکم جاری

مظفرگڑھ۔19اگست (اے پی پی) ایڈیشنل ڈپٹی کمشنر مظفرگڑھ کیپٹن ریٹائرڈ شاہ رخ خان تحصیل کوٹ ادو اچ ہیڈ تونسہ بیراج تے میڈیا نال ڳالھ مہاڑ کریندیں ہوئیں ݙسیا جو ایں ویلھے تونسہ بیراج توں 570000 کیوسک فٹ پاݨی دا سیلابی ریلا امدا پئے جیڑھا ہائی درجے دے سیلاب اچ امدے۔ انہاں ݙسیا جو ضلعی انتظمایہ ہائی فلڈ وارننگ جاری کریندیں ہوئیں بیٹ قائم والا،بیٹ لومڑ والا،بیٹ چھجڑہ سودھی 30 وستیاں کوں خالی کراݨ دا حکم جاری کر ݙتے اتے انہاں وستیاں دی 90 فیصد آبادی کوں محفوظ ڄاہ تے پڄا ݙتا ڳئے۔ کڄھ لوک آپݨی مرضی نال ٻیٹھن اتے انتظامیہ انہاں نال رابطے اچ اے اتے خطرے دی صورت اچ انہاں کوں وی کݙھ ڳھدا ویسی۔ انتظامیہ سیلاب متاثرین کیتے فلڈ ایمرجنسی کیمپ لا ݙتن جتھاں محکمہ صحت،محکمہ لائیو سٹاک،محکمہ آبپاشی،محکمہ مال اتے ریسکیو 1122 ہر ویلھے موجود ہن۔