اسلام آباد۔23اگست (اے پی پی):وفاقی وزیر بین الصوبائی رابطہ احسان الرحمن مزاری آکھیے جو کھیݙاں دے حوالے نال پاکستان پرامن ملک اے اتے پاک انگلینڈ کرکٹ ٹیسٹ سیریز توں دنیا اچ مثبت پیغام ویسی ، اے ڳالھ انہاں گزریل ݙینھ میڈیا نال ڳالھ مہاڑ کریندے ہوئیں آکھی اے، انہاں آکھیے جو ساݙی خواہش اے جو پاکستان کرکٹ ٹیم انگلینڈ دے خلاف ٹیسٹ سیریز اچ کامیاب تھیوے ، ھک سوال دے ولدے اچ احسان الرحمن مزاری آکھیے جو کھیݙاں دے حوالے نال پاکستان ھک پرامن ملک اے تے پاکستانی شائقین غیر ملکی کھلاڑیاں دے نال بے پناہ محبت کریندے پئن انہاں آکھیے جو پاک انگلینڈ کرکٹ ٹیسٹ سیریز خوش آئند اتے ایندے نال دنیا اچ ھک ٻہوں چنڳاں پیغام ویسی ، ھک ٻئے سوال دا جواب ݙیندے ہوئیں انہاں آکھیے جو پاکستانی ٹیم کوں انگلینڈ دے خلاف اپݨے ہوم گرائونڈاں دا فیدہ چیندے ہوئیں سیریز اپݨے ناں کرݨی چاہیدی اے ۔ واضح رہے جو پاک انگلینڈ ٹیسٹ سیریز دا پہلا میچ یکم توں پانچ دسمبر تئیں راولپنڈی اچ کھیݙیا ویسی ، ݙوہیں ملکاں وچال ترائے ٹیسٹ میچز دی سیریز دے بقایا ݙو میچز 9 اتے 17 دسمبر کوں شروع تھیسن ، اے میچز بالترتیب ملتان تے کراچی اچ کھیݙیے ویسن ۔
