مظفرگڑھ ،اسسٹنٹ کمشنر دی تحصیل علی پور اچ دریائے سندھ دے کچے دے علاقے اچ رہݨ آلے خانداناں کوں محفوظ جاہ تے منتقل تھیوݨ دی ہدایت

مظفرگڑھ۔30اگست (اے پی پی):اسسٹنٹ کمشنر علی پور مبین احسن مظفرگڑھ دی تحصیل علی پور اچ دریائے سندھ دے کچے دے علاقے اچ رہݨ آلے خانداناں دے ناویں ھک سنھیے اچ آکھیے جو دریائے سندھ اچ پاݨی دی مسلسل آمد توں سطح ودھدی پئی اے جیڑھا جو 7 توں 8 لکھ کیوسک تئیں ونڄ سڳدی اے ،انہاں اتھاں دے رہائشیاں کوں چتاوݨی ݙیندے ہوئیں آکھیے جو دریا دے ٻیٹ اتے نیڑے پاݨی آلے علاقیں اچ پہلے توں موجود پاݨی دی وجہ توں صورت حال خطرناک تھی سڳدی اے ، انہاں آکھیے جو دریا دے ٻیٹ دے علاقیں اچ ٻہوں زیادہ آبادی اے لیکن او کھنڈیاں ہوئیاں چھوٹیاں چھوٹیاں وستیاں دی صورت اچ ہے جیں پاروں اتھوں نکلݨ اوکھا تھی ویندے انہاں مزید آکھیے جو انتظامیہ علی پور آلا پاسہ تے راجن پور توں لوکاں دے نکلݨ کیتے ودھ توں ودھ پرائیویٹ ٻیڑیاں دا انتظام کیتا ہویا اے ،علی پور توں سرکی پتݨ،کندائی پتݨ اتے گبر ارائیں پتݨ توں 7 بیڑیاں لوکاں کوں کڈھݨ کیتے مختلف علاقیں آلے پاسے روانہ کرݙتیاں ڳئن جیڑھیاں جو اتھوں لوکاں کوں کڈھ تے علی پور گھن آسن۔انہاں آکھیے جو فلڈ کنٹرول روم دا رابطہ نمبر 0662755820 اے ایں نمبر تے 24 گھنٹے رابطہ کیتا ونڄ سڳدے انہاں مزید آکھیے جو جیڑھے لوک راجن پور آلے پاسے ونڄݨ چاہندن تاں انتظامیہ اتھاں وی ریلیف کیمپ بݨایا ہویا اے ۔