نیشنل فلڈ ریسپانس و کوآرڈینیشن سنٹر دا سیلاب اتےمینھ توں متاثرہ چھیکڑی بندے دی گھر واپسی تئیں متحد تھی تے کم دے عزم دا اظہار

اسلام آباد۔3ستمبر (اے پی پی):نیشنل فلڈ ریسپانس و کوآرڈینیشن سنٹر (این ایف آر سی سی ) سیلاب اتے مینھ توں متاثرہ آخری بندے دے آپݨے گھر آباد تھیوݨ تئیں ھک مٹھ تھی تے کم کرݨ دے عزم دا اظہار کریندے ہوئیں آکھیے جو عالمی برادری ، پاکستانی تارکین وطن اتے قوم توں اپیل کیتی اے جو او متاثرین دی بحالی تے آباد کاری کیتے ودھ چڑھ تے امدادی سرگرمیاں اچ حصہ گھنن ، موسمیاتی تبدیلیاں دی وجہ توں جنہاں علاقیں اچ مینھ گھٹ وسدا ہئی اتھاں سینکڑاں گنا ودھ مینھ وسیے ، دنیا توں ملݨ آلی امداد دی شفاف تقسیم یقینی بݨیسوں، پاکستانی عوام اتے ادارے اپݨی امداد دی تقسیم کیتے مسلح افواج دے سارے ریلیف مراکز نال رابطے کرن، متاثرہ علاقیں اچ وݙیاں سڑکاں ، ٹرانسمیشن لائناں اتے گرڈ سٹیشن کافی حد تئیں بحال کرݙتے ڳئں ، ہر بندے تئیں امدادی سامان پڄاوݨ کیتے مربوط کوششاں جاری ہن ، کوشش کریسوں جو کچے گھراں اچ رہݨ آلیں کوں انہاں دے ضیان دے ازالے دے طور تے ایجھے پکے گھر بݨا تے ݙیسوں جیڑھے جو سیلاب توں گھت متاثر تھیون ، وفاقی وزیر منصوبہ بندی ترقی و اصلاحات احسن اقبال ڈی جی آئی ایس پی آر میجر جنرل بابر افتخار، چیئرمین نیشنل فلڈ ریسپانس میجر جنرل محمد ظفر اقبال اتے چیئرمین این ڈی ایم اے لیفٹیننٹ جنرل اختر نواز دے رلے پریس کانفرنس توں خطاب کریندے ہوئیں آکھیے جو موسمیاتی تبدیلیاں دی وجہ توں جیں قدرتی آفت دا سامݨا اے اے تباہ کن تے انسانی المیہ اے، اڄوکی تاریخ اچ دنیا دے اندر ساریں تں وݙی موسمیا تی تبدیلی المیہ اے جیں دا پاکستان کوں سامݨا اے جنہاں علاقیں اچ ایں ویلھے طوفانی مینھ وسیے اتھان ساریں توں گھٹ مینھ وسدا ہئی ، اے ساݙی 30 سال دی اوسط اچ 500 گنا ودھ مینھ ہئی ، ایندے نتیجے اچ 3 کروڑ 30 لکھ دی آبادی متاثر تھئی، ایں ضیان دا پیمانہ ٻہوں وݙا اے ، امریکا تے جاپان ایں طرح دی قدرتی آفات دے سامݨے بے وس نظر آئے، پاکستان اچ ایں دا المیے دا پیمانہ حکومت اتے وسائل دے مقابلے اچ ٻہوں وݙا اے تاں جو ساݙا عزم چٹان وانڳوں مضبوط اے انہاں آکھیے ایندے توں پہلے 2005 اچ زلزلہ تے سیلاب اچ ساݙی قوم ثابت کیتے جو او رل تے ایندا مقابلہ کرݨ اچ کامیاب تھئے تے انہاں دا جذبہ متاثر نی تھیا ۔ انہاں آکھیے جو حکومت دا کوئی ادارہ یا کوئی وفاقی یا صوبائی حکومت ایندا مقابلہ نی کرسڳدی پوری قوم رل تے ایندا مقابلہ کرݨا اے انہاں آکھیے کجھ علاقیں اچ مینھ 1500 ملی میٹر تئیں وسیے اے مینھ معمول دے مطابق 15 یا 20 ملی میٹر تئیں ہوندی پئی ، ودھ مینھ تے سندھ تے بلوچستان اچ خراب اثرات تھئن ایں توں انڄ جنوبی پنجاب ، گلگت بلتستان، خیبر پختونخوا اتے کشمیر دے کجھ علاقے وی متاثر تھئن ، انہاں آکھیے جو ایں ویلھے جیڑھی تباہی تھئی اے ایندی وݙی وجہ تکھا مینھ تے طغیانی ہئی۔ انفراسٹرکچر دا نظام بلوچستان اچ وݙی تعداد اچ تباہ تھئے ، ملک کوں بلوچستان نال جوڑݨ آلیاں 14 وݙیاں سڑکاں جنہاں دا ملکی معیشت اچ وݙا کردار اے او متاثر ہن تاں جو انہاں اچوں این ایچ اے دیاں کاوشاں نال مسلح افواج دے انجینئرز 11 کوں بحال کرݙتے صرف 3 ہائی ویز تے جزوی بلاک ہن انہاں دی بحالی کیتے ݙینھ رات کم تھیندا پئے جیڑھیاں کجھ ݙینھ اچ بحال تھی ویسن ۔ انہاں ݙسائے جو سندھ اچ پاݨی ہولے ہولے لہندا پئے اتھاں علاقے سمندر دا منظر پیش کریندے پئن ، اتھاں سارے ادارے اتے صوبائی انتظامیہ رل تے بحالی کیتے کوشاں ہن اتھاں 230 اموات تھئن، سڑکاں متاثر تھئن، منڈا ہیڈورکس کوں ضیان تھئے پنجاب اچ ڈیرہ غازی خان ڈویژن کوں سیلاب متاثر کیتے، اتھاں 54 بندے جاں بحق تھئن ، فصلاں، لائیوسٹاک دا وی ضیان تھئے ۔81 متاثرہ گرڈ سٹیشناں اچوں 69 بحال تھی ڳئن ، 881 فیڈر متاثر تھئن انہاں اچوں 758 بحال تھی ڳئن ، 123 دی بحالی تے کم جاری اے ، 8 ٹرانسمیشن لائناں کوں وی ضیان تھئے ، صوبہ بلوچستان اچ 2900 بحال تھی ڳئن باقی کیتے وزیراعظم 48 گھنٹے دا وقت ݙتے ، انہاں دیان 600 توں ودھ ٹیماں فیلڈ اچ کم کریندیاں پئن ۔چیئرمین این ڈی ایم اے ݙسایا جو سال 2022 پاکستان کیتے موسمیاتی تبدیلیاں دا باعث بݨیا ، 4 ہیٹ ویوز دا سامݨا کیتے جیں توں وݙی مقدار اچ جنگلات کوں بھاہ لڳی ، ایندے بعد ودھ سارے مینھ دا سامݨا اے ایں سال 20 توں 25 فیصدودھ مینھ وسݨا ہئی 190 فیصد توں ودھ مینھ وسیے ، بلوچستان اچ 436 اتے سندھ اچ 464 فیصد ودھ مینھ وسیے ۔ مجموعی طور تے ایں مینھ توں 1265 اموات تھئن جیں اچ زیادہ تعداد ٻالاں دی اے ، انفراسٹرکچر تےلائیو سٹاک دا ضیان تھئے ،7 لکھ 35 ہزار مال ڈھور وھہہ ڳئے ، 5563 سڑکاں، 263 پل تباہ تھئن ایندی بحالی کیتے اقدامات جاری ہن ۔ ڈی جی آئی ایس پی آر میجر جنرل بابر افتخار ݙسایا جو پاک فوج دا ہر جوان امدادی کماں کوں قومی فریضہ سمجھ تے سرانجام ݙیندا پئے، 6 آفیسر تے جوان ایں خدمت اچ جام شہادت نوش کر ڳئے، آرمی چیف دی خصوصی ہدایت دے مطابق اساں عوام کوں لکھا نہ چھوڑیسوں بھاویں ایں کیتے کتنا کم کیوں نہ کرݨا پووے ، آرمی فلڈ ریلیف اتے کو آرڈینیشن سنٹر قائم کیتا ڳئے ، ریسکیو اتے بحالی دی حکمت عملی دے تحت افواج پاکستان ، سول انتظامیہ ، این ڈی ایم اے دے نال رل تے جامع حکمت عملی دے تحت کم کریندی پئی اے ، آرمی چیف سندھ، خیبرپختونخوا تے بلوچستان دے متاثرہ علاقیں دے دورے کیتے اتھان جاری ریلیف آپریشن دا جائزہ ڳھدا ، آرمی دیاں ساریاں فارمیشنز فعال ہن، پاکستان آرمی، ایئر فورس اتے نیوی دے ہیلی کاپٹر مسلسل فعال ہن، موسم دی مشکلات دے باوجود لوکاں کوں ریسکیو کیتا ڳئے ، کمراٹ کالام اچ پتھے سیاحواں کوں محفوظ جاہ تے پڄایا ڳئے ، متاثرین کیتے ہیلپ لائن قائم کیتی ڳئی اے ، پاک فوج دے 147 ریلیف کیمپ قائم ہن،250 میڈیکل کیمپ قائم کیتے ڳئں جتھاں 83 ہزار توں ودھ مریضاں دا علاج کیتا ڳئے ، سندھ کیتے اضافی میڈیکل ریسورسز بھجوا ݙتے ڳئن، آرمی 1685 ٹن راشن ݙتے،284 فلڈ ریلیف کولیکشن پوائنٹ قائم کیتے ڳئن جتھاں ہزاراں ٹن اتے دوائیں جمع تھئن، 1793 ٹن سامان متاثرین کوں ݙتا ڳئے ۔ نیوی تے ایئر فورس دیاں امدادی ٹیماں دی کارکردگی قابل ذکر اے، سی ون 30دیاں پروازاں دے دوران ہزاراں لوکاں کوں ریسکیو کیتا ڳئے۔ پاکستان نیوی 10 ہزار متاثرین کوں ریسکیو کیتے۔