اسلام آباد۔4ستمبر (اے پی پی):وزیر خزانہ مفتاع اسماعیل آکھیے جو پاکستانی قوم کوں اپݨے وسائل اچ رہݨا چاہیدے ۔ تباہ کن سیلاب دی وجہ توں افراط زر دی شرح ودھݨ دا ݙر اے ۔ معروف عالمی جریدے بلوم برگ کوں انٹرویو ݙیندے ہوئیں وزیر خزانہ مفتاع اسماعیل آکھیے جو اساکوں ݙھاکیں پراݨے طور طریقیں کوں بدلݨا ہوسی تاں جو قوم کوں آپݨے وسائل اچ رہݨ دے سلسلے اچ مدد ݙتی ونڄ سڳے ، انہاں آکھیے جو درآمدی ادائیگیاں کوں ڈالر دی وصولیاں دے مساوی ہووݨا چاہیدے جیں کیتے وݙے عرصے تئیں پرتعیش چیزاں دی درآمدات تے پابندی ناگزیر اے ۔ انہاں آکھیے جو میں ھک ایجھے پاکستان دا خواہشمند ہاں جیڑھا آپݨے وسائل اچ رہ سڳے تاں جو کہیں ادارے توں قرض دی لوڑھ نہ پیش آوے۔ وفاقی وزیر آکھیے ایں حوالے نال ھک سوال اچ کجھ نی کیتا ونڄ سڳدا تاں جو اساں کم شروع کرݙتے انہاں آکھیے جو تباہ کن سیلاباں اتے مینھ پاروں ملک دا اقتصادی آئوٹ لک مزید اوکھا تھی ڳئے کیوں جو سیلاب تے مینھ دے معاشی اثرات دا تخمینہ 10ارب ڈالر توں ودھ اے ۔ انہاں آکھیے جو کجھ سیاسی رہنما وی معاشی مشکلات دا سبب بݨدے پئن ۔ مفتاع اسماعیل آکھیے گزریل ہفتے بین الاقوامی مالیاتی فنڈ دی طروں 1.16ارب ڈالر ملئن جیں دی وجہ توں پاکستان ڈیفالٹ دے فوری خطرے توں نکل چکیے ، انہاں آکھیے جو قطر، سعودی عرب اتے متحدہ عرب امارات دی طرفوں وی پاکستان اچ 9ارب ڈالر توں ودھ دی سرمایہ کاریاں تے قرضیں دا یقین ݙیوایا ڳئے ، وفاقی وزیر خزانہ آکھیے جو کجھ سرکاری اداریں اچ ھک مہینے دے اندر اندر ھک ارب ڈالر دی سرمایہ کاری متوقع اے۔ انہاں آکھیے جو 29اگست کوں آئی ایم ایف پاکستان کیتے بیل آئوٹ پیکج دی منظوری ݙتی ، جیں توں سیاسی کشمکش اتے تباہ کن سیلاب نال نبݨݨ آلے ملک دے فوری ڈیفالٹ دا خطرہ مک ڳئے ۔ مفتاع اسماعیل آکھیے جو پاکستان دے تجارتی تے مالیاتی خسارے کوں گھٹ کرݨ میݙی اولین ترجیح اے۔
