اسلام آباد۔9اکتوبر(اے پی پی) وزیراعظم دے مشیر فیصل کریم کنڈی عالم اسلام کوں عید میلاد النبی ﷺ دی مبارک ݙیندے آکھیے جو 7 اکتوبر دیرہ اسماعیل خان دی تریخ دا اہم ݙینھ اے ڄݙاں ایکنک چشمہ لفٹ کینال منصوبہ دی منظوری ݙتی ہئی،اساں تیکھے بلاول بھٹو زرداری کوں لفٹ کینال دے افتتاح سانگے دیرہ اسماعیل خان گھن ویسوں ۔ انہاں آکھیا جو وزیراعظم پاکستان شہباز شریف ، وزیرخزانہ اسحاق ڈار، وزیر واپڈا خورشید شاہ دے خیبرپختونخوا تے دیرے دی عوام ولوں شکر گزار ہیں، ڄݙاں خورشید شاہ واپڈا دے وفاقی وزیر ٻݨٰے تاں انہاں دے نال سانجھی پریس کانفرنس اچ چشمہ لفٹ کینال منصوبہ تے پیش رفت تے الایا ہا، چیئرمین بلاول بھٹو زرداری دی ہدایت تے سیلاب دیاں تباہ کاریاں دے باوجود چشمہ لفٹ کینال دی ایکنک توں منظوری دیرہ آلیاں کیتے ہک وݙی خوشخبری اے ۔کنڈی آکھیا جو شہید ذوالفقارعلی بھٹو چشمہ رائیٹ بنک کینال دا تحفہ ڈتا ہا تے انھاں دے ݙوترے بلاول بھٹو زرداری دیاں کوششاں نال لفٹ کینال دا تحفہ ملیے، چشمہ لفٹ کینال منصوبہ نال پاکستان دی کݨک دی لوڑھ دیرہ اسماعیل خان پوری کریسی، علاقے اچ ساوا انقلاب آسی۔انہاں آکھیا جو پچھلی حکومت اتھو دے عوامی نمائندیاں دیرے دے دفتراں،نیشنل بنک ریجنل دفتر ، پی ٹی وی ، اے پی پی ، پی آئی اے تے ڈوجھے دفتر ختم کراݙتے ہن اساں انہاں دفتراں کوں دیرے وچ ولا بحال کریسوں اتے دیرہ دے حقوق باہر نہ ونڄݨ ݙیسوں ، اساں دعویاں دی بجائے عملی ثبوت ݙیندے پئے ہیں۔انہاں آکھیا جو پاکستان پیپلز پارٹی جاڳدی پئی اے اتےدیرہ دے حق تے ݙاکہ مارݨ آلیاں کوں نا چھڑیسوں۔
