اسلام آباد۔10اکتوبر (اے پی پی سرائیکی نیوز سروس ) وفاقی وزیر صنعت تے پیداوار مرتضی محمود آکھیا جو سرائیکی بیلٹ سمیت چھل متاثرہ علاقیاں اچ فصلاں دے تھیوݨ آلے نقصان دے ازالے اتے نویں فصلاں دی کاشت بارے حکمت عملی ٻݨائی ویندی پئی اے۔ انہاں آکھیا جو جنوبی پنجاب دے چھل متاثرہ علاقیاں کیتے ہک لکھ 36 ہزار راشن بیگز، 25 ہزار فی کس بےنظیر انکم سپورٹ پروگرام ولوں جنوبی پنجاب اچ آفت ذدہ قرار ݙتے ڳئے علاقیاں اچ تقسیم کیتےڳئن۔ انہاں آکھیا جو جنوبی پنجاب کیتے وزیراعظم شہباز شریف فلڈ ریلیف کیتے ہک کمیٹی ٻݨائی ہئی جئیں اچ میں وی ہم، ایندے اچ اساں خصوصی طور میݙی وزارت یوٹیلیٹی سٹوز ولوں ہک لکھ 36 ہزار راشن بیگز سمری ٻھیج تے جنوبی پنجاب دے چھل توں متاثر علاقے ڈیری غازی خان، راجن پور، رحیم یار خان جیڑھے جو ساریاں توں ودھ متاثر تھیوݨ آلی اضلاع ہن، ڈیرہ خازی خان اچ تونسہ شریف ساریاں توں ودھ متاثر تھیوݨ آلے علاقیاں اچ ہئی۔ 60 ہزار بیگز اساں ڈیرہ خازی خان اچ تقسیم کرائے ہن۔ تقریباً 40 ہزار بیگز راجن پور ،تقریباً 24 ہزار بیگز رحیم یار خان اچ تقسیم کرائے ڳئے ہن۔ انہاں آکھیا جو متاثرہ علاقیاں دا میں آپ دورہ کیتا ہئی اتے جائزہ ڳھدا ہئی۔ ایندے علاوہ 25 ہزار فی کس بے نظیر انکم سپورٹ پروگرام ولوں جنوبی پنجاب اچ آفت ذدہ قرار علاقیاں اچ تقسیم کیتے ڳئن۔ انہاں آکھیا جو راشن دی تقسیم اتے پنجوی ہزار نقد رقم دی تقسیم دے بعد حکومت دا اگلا لائحہ عمل متاثرہ علاقیاں دی بحالی اے، ایں پروگرام اچ اساں متاثرہ علاقیاں اچ متاثرین جنہاں دے مکان ݙہہ ڳئن انہاں دی بحالی حکومت دی پہلی ترجیح اے۔ چھل توں متاثرہ علاقیاں اچ فصلاں دے تھیوݨ آلے نقصان دے ازالے کیتے فوڈ اینڈ سکیورٹی دی وزارت اقدامات کریندی پئی اے۔ انہاں آکھیا جو سندھ اچ حکومت صوبائی حکومتاں نال رل تے بنیادی طور تے کھڑی پاݨی کوں کݙھݨ کیتے اقدامات کریندی پئی اے۔
