اسلام آباد۔11اکتوبر (اے پی پی سرائیکی نیوز سروس) مظفرگڑھ توں تعلق رکھݨ آلے سرائیکی دے چوݨویں ادیباں تے شاعراں اچوں ارشاد العصر جعفری ست سالیں اچ نو ایوارڈ ڳھدن۔ اے پی پی سرائیکی نیوز سروس کوں انہاں ݙسائے جو انہاں پہلا قومی تے صوبائی ایوارڈ 2015 اچ ڳھدا۔ 2018 اچ ہک واری ولا صوبائی ایوارڈ ݙتا ڳیا۔ 2019 اچ قومی ایوارڈ آپݨےناں کیتا۔ 2020 اچ صوبائی اتے 2021 اچ ولا قومی ایوارڈ ݙتا ڳیا۔
2022 ارشاد العصر جعفری کوں مشہد مقدس توں رضویہ عالمی ادبی ایوارڈ ݙتا ڳیا۔ بھیل انٹرنیشنل ادبی ایوارڈ آپݨے ناں کیتا اتے ہݨ 11 ربیع الاول کوں ہک واری ولا صوبائی سطح اعزاز حاصل کیتا ۔
ارشاد العصر جعفری اٹھ سال دی عمر توں لکھݨ شروع کر ݙتا ہئی۔ انہاں آپݨی پہلی کہانی روزنامہ امروز اچ ” ڈبو کی شرارت ” دے عنوان نال لکھی۔ آپݨی پہلی لکھت دی وجہ توں قارئین اچ مشہور تھیے۔ بعد اچ پاکستان دے ساریاں توں مقبول سلسلہ ناول عمران سیریز دے کئی ناول لکھیے جئیں اچ انہاں دی مقبولیت پورے جڳ اچ کھنݙ ڳئی۔ انھاں دے لکھیے ڳئے عمران سیریز دی کہانیاں کوں جرمن رائٹر جرمن زبان اچ ترجمہ کیتے ۔ شئیت ای کوئی موضوع ہووے جئیں تے ارشاد العصر جعفری دے قلم نہ چاتاہووے۔انہاں مختلف شخصیات حضرت محمد صلی اللہ علیہ وآلہ وسلم توں ڳھن تے اہل بیت علیہم السلام اتے خاص طور تے او شخصیات جینویں جو نبی پاک صلی اللہ علیہ وآلہ وسلم دے ابا تے اماں اتے انھاں دی جد امجد دی حیاتی کوں ڄاݨݨ کیتے کتاباں لکھیاں۔ ایں توں علاوہ ارشاد العصر جعفری اردو ادب دے ودھارے تے نویں آوݨ آلے تے پراݨے لکھاریاں سانڳے ” قلم اردو ” دے ناں نال ادارہ ٻݨایا ٻیا انہاں ڈاٹ کام اچ ہک ویب سائیٹ وی چلائی جتھ او اردو اتے سرائیکی زبان دے ودھارے تے کم کریندے پئن۔ سرائیکی کتاب سالار کائنات ایں سال جولائی اچ چھپی اے جئیں صوبائی مقابلہ سیرت کتب اچ پہلی پوزیشن ڳھدی اے ۔ انہاں دیاں سرائیکی کتاباں اچ سوجھلا،اول نور،سوھݨے نبی دے سوھݨے رشتے،سالار کائنات تے چوبلا ( مزاحیہ ناول) شامل ہن۔
