کرائسٹ چرچ۔13اکتوبر(اے پی پی)نیوزی لیند دے شہر کرائسٹ چرچ اچ تھیوݨ آلے سہ فریقی ٹی 20 سیریز دے چھیکڑی میچ اچ پاکستان بنگلا دیش کوں 7 وکٹاں توں ہرا ݙتے اتے ایونٹ دے فائنل اچ پڄ ڳئے۔ پہلے کھیݙدے ہوئے بنگلادیش دی ٹیم 20 اووراں اچ 6 وکٹاں ونڄا تے 173 رنز ٻݨائن۔ لٹن داس اتے کپتان شکیب الحسن ٹاپ سکورر رہین جنہاں بالترتیب 69 اتے 68 رنز ٻݨائے، اوپنرز نجم الحسین شنتو 12 اتے سمعیہ سرکار 4 رنز، عفیف حسین 11، یاسر علی ہک، نور الحسن 2 اتے محمد سیف الدین ہک رن ٻݨائے۔ پاکستان ولوں نسیم شاہ اتے محمد وسیم 2، 2 ڄݙاں جو محمد نواز ہک وکٹ ڳھدی، محمد رضوان ہک کھیݙاڑی کوں رن آؤٹ کیتے۔ ولدے اچ پاکستان سکور پورا کر ڳھدے۔ اوپنر محمد رضوان 69 اتے بابراعظم 55 رنز نال ٹاپ سکورر رہین ڄݙاں جو محمد نواز صرف 20 ٻالاں تے 45 رنز دے میچ وننگ اننگ کھیݙی۔ قومی ٹیم فائنل اچ پڄ ڳئے اے جتھاں اوندا مقابلہ نیوزی لینڈ نال جمعہ کوں تھیسی۔
