اسلام آباد۔8نومبر (اے پی پی سرائیکی نیوز سروس) سرائیکی عوامی تریمت تحریک دی اڳواݨ ادی عابدہ بتول آکھیا جو میں ٻہوں ݙکھی دل نال اے ڳالھ کریساں جو پاکستان اچ ٻالاں دے ادب تے کوئی خاطر خواہ اتے حوصلہ افزاء کم نی تھیا اتے سرائیکی بالاں کیتے سرکاری سطح تے وی کوئی کم کائنی تھیا۔ کجھ اساݙے ادیب اتے شاعر ہن جنہاں اساݙے بالاں دے حقوق واسطے تاں ڳالھ کیتی اے، انہاں دی گروتھ واسطے انہاں کجھ لکھیے ، کجھ اردو ادب اچ کم تھیے پر سرائیکی اچ ڳھٹ کم تھیے۔ اے ڳالھیں انہاں اےپی پی سرائیکی نیوز سروس نال خصوصی ڳالھ مہاڑ کریندیں ہوئیں آکھی۔ انہاں آکھیا جوالیکٹرانک میڈیا دے آوݨ نال اساݙا حق کھسیا ڳے ، ریڈیو پاکستان تے کہانیاں سݨائی ویندی ہن او کائنی، ٹی وی تے وی ٻالاں کیتے کوئی پروگرام کائنی۔ ایندے علاوہ ماء پیو دے مصروف تھیوݨ نال اتے ٻالاں تے توجہ نہ ہووݨ پاروں وی ٻالاں دی تربیت تے فرق پوندے۔ اساݙے ادیب اتے شاعر انقلاب واسطے اتے لوکاں دی حالت بدلݨ کیتے ٻہوں چنڳا کم کریندے پن ، اے خوشی دی ڳالھ اے جو کجھ علاقیاں دے سکولاں اچ سرائیکی زبان اچ نظماں ٻݨا تے ٻالاں کوں الجبرا، ریاضی اتے انگریزی انہاں کوں سکھائی ویندی اے۔ انہاں آکھیا جو ذاتی طور تے تاں کجھ سکول، صحافی اتے کجھ لکھاری کم کریندے پن پر سرکاری سرپرستی نہ ہووݨ دے برابر اے۔ خصوصی طور پنجاب حکومت ولوں سرائیکی تعلیم واسطے کوئی اقدامات نی کیتے ویندے پے۔ میکوں خوشی اے جو اسلام آباد اچ ٻالاں دے ادب بارے اتنا وݙا پروگرام تھیندا پے ، میں انہاں دے توسط نال حکومت پاکستان، سارے ادیباں اتے ایہو جیہے سارے اداریاں کوں ارداس کریساں جو سرائیکی علاقیاں اچ سرائیکی زبان اچ تعلیم اتے خصوصی طور ٻالاں دے ادب بارے اقدامات کیتے ونڄن۔
